مەكتەبی سیاسی بۆ كارەساتی 1ی شوبات: یەكڕیزی و یەكهەڵوێستی بەردەواممان پێویستە

PUKMEDIA

لۆگۆی یەکێتیی نیشتمانیی کوردستان

لە بیرەوەری 20 ساڵەی  كارەساتی یەكی  شوباتدا، مەكتەبی سیاسی یەكێتیی نیشتیمانیی كوردستان پەیامێك بڵاودەكاتەوەو رایدەگەیەنێت: "كارەساتی 1ی شوبات كۆستێكی گەورە  بوو  بۆ میللەتەكەمان، هاوكات پەیام و راچڵەكینێكی مێژووییش بوو  بۆ  بزوتنەوەی سیاسیی كوردستان كە تیرۆرستان و دوژمنانی گەلەكەمان بێ جیاكاری نێوان رەنگەكانمان، وەك یەك نەتەوە دەمانكەنە ئامانجی لەناوبردن و كوشتن و جینۆساید".

دەقی پەیامەكە:
پەیامی  مەكتەبی سیاسی 
لە بیرەوەری بیست ساڵەی  كارەساتی یەكی  شوباتدا 

كۆمەڵانی خەڵكی كوردستان

هاووڵاتیانی خۆشەویستی هەولێری پایتەخت

بیست ساڵ لەمەوپێش، لەبەرە بەیانی جەژنی  قوربانی ساڵی  2004 دا، تیرۆریستان بۆنەی جەژن و گەردەن ئازادی گەلی كوردستانیان  خەڵتانی خوێن و فرمێسك  كرد.

كارەساتی 1ی شوبات كە زیاتر لە سەد و پێنج شەهید و برینداری لێكەوتەوە لە سەركردە و ئەندامانی  یەكێتی و پارتی  و هاووڵاتیانی هەولێری خۆشەویست،  زیان و كۆستێكی گەورە  بوو  لە میللەتەكەمان لە  عیراقی پاش كەوتنی دیكتاتۆری كە رووی لە داڕشتنی پڕۆسەیەكی سیاسی نوێ، دیموكراسیی و  فیدراڵی بوو، لە هەمان كاتدا پەیام و  راچڵەكینێكی   مێژووییش بوو  بۆ  بزوتنەوەی سیاسیی كوردستان و هێزە سیاسییەكانی  كە تیرۆرستان و دوژمنانی گەلەكەمان بێ جیاوازی بارەگای مەڵبەند و لق، بێ جیاكاری لە نێوان یەكێتی و پارتی و رەنگەكانمان، وەك یەك نەتەوە و یەك  چارەنووس دەمانكەنە ئامانجی لەناوبردن و كوشتن و جینۆساید، بۆیە بەرگرتن لە  دوبارەبوونەوەی  كارەساتێكی  وەها جگە لە  ئاگایی و چاوكراوەیی  زیاتری  ئەمنی، پێویستی  بە یەكڕیزی و یەك ھەڵوێستی بەردەوامی هەموو لایەكمانە، بەتایبەتی لەمڕۆدا كە هەڕەشەی هەمەجۆری سەر ئەزموونەكەمان لێمان دەخوازێ پێكەوە تەگبیری هاوبەش و دەستپێشخەری بنیاتنەرانە بگرینەبەر و هەڕەشەكان بكەینە دەرفەتێكی گونجاوتر بۆ داهاتوومان .

جارێكی تر لەم یادەدا سەری رێز و نەوازش و وەفاداری  بۆ  شەهیدانی سەركردە و تێكۆشەران و ھاووڵاتیانی كە بۆ پیرۆزبایی و گەردەن ئازادی جەژن ھاتبوون، و  گشت شەهیدانی رێگای رزگاری و سەرفرازی گەلەكەمان، دادەنەوێنین.

مەكتەبی سیاسی
یەكێتیی نیشتیمانیی كوردستان

PUKMEDIA