ئەمریکا و بەریتانیا و فەرەنسا لەسەر هێرشەکەی کۆرمۆر هاتنەدەنگ

PUKMEDIA

کێڵگەی غازی کۆرمۆر

هەریەک لە باڵیۆزی ئەمریکا لە عێراق و باڵیۆزی بەریتانیا لە عیراق و باڵیۆزخانەی فەرەنساش لە عیراق بەتوندی هێرشەکەی سەر کۆرمۆر  ئیدانە دەکەن و لەپەیامێکدا دەڵێن:" ئەو  هێرشە بۆ سەر کۆرمۆری هەرێمی کوردستان بووە هۆکاری  بێبەشکردنی چەندین  ملیۆن هاوڵاتی لە کارەبا لەم وەرزی زستانەدا". 

ئێوارەی 25ی 1ی 2024 هێرش کرایە سەر کێڵگەی غازی کۆرمۆر لەسنووری چەمچەماڵ و زیانی ماددی لێکەوتەوە و بەهۆیەوە بەرهەمهێنان و گواستنەوەی غاز بۆ وێستگەکانی بەرهەمهێنانی کارەباش راگیرا و لەو چوارچێوەیەدا ئالینا رومۆنسکی باڵیۆزی ئەمریکا لە عێراق ئەمڕۆ هەینی لە تۆڕی کۆمەڵایەتی x وەک هەڵوێستی رەسمی ئەمریكا رایگەیاند: "ئەو هێرشەی کۆرمۆر پەلاماردانی ژێرخانی ئاوەدانیی و ئابووریەو ئەنجامەکەی ئەوەیە کە لەم وەرزی زستانەدا چەندین ملیۆن هاووڵاتی بێکارەبا بوون، بۆیە ئەمریکا پشتیوانی هاوبەشەکانی دەکات لە عیراق و هەرێمی کوردستان و پاڵپشتیکردنی سەروەری و ئارامی".

هاوکات لە پەیامێکدا کە لە تۆڕی کۆمەڵایەتیی ئێکس X بڵاویکردووەتەوە، باڵیۆزی بەریتانیا لە عیراق ئیدانەی هێرشەکەی سەر کێڵگەی گازی کۆرمۆر دەکات و دەڵێت: "ئەم هەوڵانە پێشکەوتنی عێراق و هەرێمی کوردستان دوادەخەن".

هەر بەو هۆکارە باڵیۆزخانەی فەرەنسا لە عیراق بەیاننامەیەک بڵاودەکاتەوەو تێدا رایدەگەیەنێت: "زۆر بەتوندی ئیدانەی ئەو هێرشە دەکەین و کەبوە هۆی کەوتنەوەی ئاگرێکی گەورە و راگرتنی بەرهەمهێنانی کارەبا و ئەو هێرشانە دەستدرێژییە بۆسەر سەقامگیری عیراق و هەرێمی کوردستان و قبوڵنەکراوە".

شەوی 2024/1/25  بەهۆی كەوتنەوەی ئاگرێكەوە لە كێڵگەی غازی كۆرمۆر، لەپێناو سەلامەتیی کارمەندان و كێڵگەكە هەناردەكردنی غاز بۆ سەرجەم وێستگەكانی بەرهەمهێنانی كارەبا راگیرا و بووە هۆی كەمبوونەوەی زیاتر لە 2800 مێگاوات بەرهەمهێنانی كارەبا.

PUKMEDIA