خانمی یەكەمی عیراق: پشتیوانی ژنان و كچانی ئێزدی دەبین

نوسینگەی راگەیاندنی خانمی یەكەمی عيراق

خانمی یەكەم و جێگری باڵیۆزی بەریتانیا لە عیراق

شاناز ئیبراهیم ئەحمەد خانمی یەكەمی عیراق، پێشوازی لە خاتوو روزی كییف جێگری باڵیۆزی بەریتانیا لە عیراق كرد.

لەو دیدارەدا، كە رۆژی 16-1-2024 لە كۆشكی سەلام لە بەغدا بەڕێوەچوو، خاتوو روزی نیگەرانی و پرسەو سەرەخۆشی خۆی گەیاندە خانمی یەكەم بۆ ئەو هێرش و پەلامارانەی شەوی دوو شەممە كرانەسەر پارێزگای هەولێر و بەهۆیەوە چەندین كەس بوونە قوربانی.

لەدیدارەكەدا گفتوگۆ  كرا لەبارەی دۆخی ژنان لەسایەی ئەو گۆڕانكارییانەی وڵات پێیدا تێپەڕدەبێت، بەتایبەت كاریگەریی جەنگ و توندوتیژی و زوڵم و ستەمی هێزە تاریكپەرستەكان بەرامبەر بە ژنان.

لەو چوارچێوەیەدا خانمی یەكەم رایگەیاند: "پاڵپشت و پشتیوانی بەردەوامی ژنان و كچانی رزگاربووی ئێزدی دەبین بۆ تێپەڕاندنی ئەو نەهامەتی و بارە دەروونییە ناهەموارەی روبەڕوی بوونەوە بەوپێیەی زۆرترین ئازار و نادادپەروەرییان بەرامبەر كراوە لە جیهاندا".

لەوبارەیەوە جێگری باڵیۆزی بەریتانیا ئامادەیی وڵاتەكەی دەربڕی بۆ هاوكاریكردنی ژنانی عیراق بەگشتی و ئێزدییەكان بەتایبەت بۆ دووبارە شیاندنەوە و گێڕاندنەوەیان بۆ نێو كۆمەڵگە.

لەتەوەرێكی دیكەدا هۆكارەكانی زیادبوونی توندوتیژی خێزانی و چۆنێتی روبەڕوبوونەوەی تاووتوێ كرا، بەوپێیەی چەندین كاریگەری جەستەیی و ئابوری و دەروونی مەترسیداری كورت و درێژخایەنی هەیە و وادەكات ژنان نەتوانن بەتەواوی رۆڵی یەكسانی خۆیان ببینن لەكۆمەڵگەدا.

PUKMEDIA