ئەمڕۆ زانیاری لەسەر ئەنجامی تانەی هەڵبژاردنی پارێزگاكان ئاشكرادەكرێت

PUKMEDIA

لۆگۆی کۆمسیۆن

ئەمڕۆ كۆمسیۆنی باڵای سەربەخۆی هەڵبژاردنەكانی عیراق زانیاری لەسەر ئەنجامی تانەی هەڵبژاردنی ئەنجومەنی پارێزگاكانی عیراق ئاشكرا دەكات و وتەبێژی كۆمسیۆنیش دەڵێت: "نزیكەی 300  تانە لەئەنجامی هەڵبژاردنی ئەنجومەنی پارێزگاكان دراون".

سەرچاوەیەك لە كۆمسیۆنی باڵای سەربەخۆی هەڵبژاردنەكانی عیراق لە لێدوانێكیدا بۆ سایتی رەسمی یەكێتیی نیشتمانیی كوردستان PUKMEDIA رایگەیاند: "بڕیارە ئێوارەی ئەمڕۆ 14-1-2024، عەلی فەیسەڵ دەحام ئەمینداری كۆمسیۆنی باڵای سەربەخۆی هەڵبژاردنەكانی عیراق، نوێترین زانیاری ئاشكرا بكات لەبارەی ئەنجامی تانەی لایەنە سیاسییەكان لەسەر ئەنجامی راگەیەندراوی هەڵبژاردنی ئەنجومەنی پارێزگاكانی عیراق".

جومانە غەلای وتەبێژی كۆمسیۆنی باڵای سەربەخۆی هەڵبژاردنەكانی عیراق بە  PUKMEDIA ی رایگەیاند: "تائێستا نزیكەی 300  تانە لەئەنجامی هەڵبژاردنی ئەنجومەنی پارێزگاكانی عیراق دراون و تانەكانیش بەدەست كۆمسیۆنی باڵای سەربەخۆی هەڵبژاردنەكان گەیشتون".

رۆژانی 16 و 18ی 12ی 2023، هەڵبژاردنی ئەنجومەنی پارێزگاكانی عیراق بەڕێوەچوو كە تێیدا یەكێتیی نیشتمانیی كوردستان یەكەمی كەركوك بوو و هاوپەیمانییەكەی بەناوی هاوپەیمانی كەركوك هێز و ئیرادەمانە، 157 هەزار و 639 دەنگی بەدەستهێنا كە دەكاتە لە 43% ی دەنگەكانی ئەو پارێزگایەو بووە خاوەنی 5 كورسی ئەنجومەنی پارێزگای كەركوك.


PUKMEDIA