وتەبێژی کۆمسیۆن: 453 سکاڵا تۆمارکراون

PUKMEDIA

وتەبێژی کۆمسیۆن

کۆمسیۆنی باڵای سەربەخۆی هەڵبژاردنەکان هەتا ئێستا لە جیاکردنەوەی دەنگەکانی هەڵبژاردنی ئەنجومەنی پارێزگاکانی عیراق بەردەوامە و وتەبێژی کۆمسیۆنیش دەڵێت: "تا ئێستا 453 سکاڵامان بەدەست گەیشتوەو لە چەند رۆژی داهاتووشدا ئەنجامی کۆتایی هەڵبژاردن رادەگەیەنرێت".

جومانە غلای وتەبێژی کۆمسیۆنی باڵای سەربەخۆی هەڵبژاردنەکانی عیراق لە لێدوانێکیدا بە سایتی رەسمی یەکێتیی نیشتمانیی کوردستان PUKMEDIA ی راگەیاند: " کۆمسیۆنی باڵای سەربەخۆی هەڵبژاردنەکان هەتا ئێستا 453 سکاڵای لە هەڵبژاردنی ئەنجومەنی پارێزگاکانی عیراق بەدەست گەیشتووە، کەلە نێوانیاندا سکاڵای سەوز هەیە کە کۆمسیۆن وەری ناگرێت و رەتدەکرێتەوە و سکاڵای زەرد هەیە لەسەر چاودێران و ئامێرەکانی دەنگدان و کارمەندانی کۆمسیۆن، کەبەهۆیەوە کۆمسیۆن سزای کەمتەرخەمەکان دەدات، لەو سکاڵایانەش هیچ سورێکی تێدا نەبووە".

"کۆمسیۆن لیژنەیەکی هەیە کە خوێندنەوە بۆ سەرجەم سکاڵاکان لەسەر پرۆسەی هەڵبژاردن دەکات و بۆ سەوز و زەرد جیایان دەکاتەوەو لێکۆڵینەوەیان لەسەر دەکات و پرۆسەکەش هەتا ئێستا بەردەوامە و دواتر لیژنەکە سکاڵاکان بۆ بڕیاردان لەسەری بۆ ئەنجومەنی کۆمسیاران بەرزدەکاتەوە"، جومانە غلای وای وت.

وتەبێژەکەی کۆمسیۆن ئەوەش دەڵێت: "لە چەند رۆژی داهاتوودا ئەنجامی کۆتایی رادەگەیەنرێت و لەئێستادا کۆمسیۆن سەرقاڵە بە هەژماردکردنی دەستی دەنگەکان و ئەوەش چەند رۆژێکی دەوێت بەتایبەت جیاکردنەوەی دەستی دەنگدانی تایبەت، ئەوەش پرۆسەیەکە درێژە دەکێشێت لەبەر ئەوەی دەنگدەری تایبەت هەیە لە هێزە ئەمنییەکان و پەنابەران دەنگدەری بەغدا بون و لە ئەنبار دەنگیان داوە".

PUKMEDIA