جیاكردنەوەو ژماردنی سندوقەكانی دەنگدانی تایبەت دەستپێدەكات

كۆسرەت فەیسەڵ كەتۆ

پڕۆسەی جیاكردنەوەو ژماردنی سندوقەكانی دەنگدانی تایبەت

بڕیارە كەمێكی تر دەستبكرێت بە جیاكردنەوە و ژماردنی سندوقەكانی دەنگدانی تایبەت لە 15 پارێزگاكەی عیراق كە رۆژی شەممە 16-12-2023، دەنگدانی تایبەتی تێدا ئەنجامدرا و زیاتر لە ملیۆنێك دەنگدەری تایبەت دەنگیاندا.

بەگوێرەی زانیارییەكانی PUKMEDIA پڕۆسەی جیاكردنەوە و هەژماركردنی دەنگەكان لە كەركوك  و دهۆك دەستیپێكردووە و هاوپەیمانی كەركوك هێز و ئیرادەمانە لە كەركوك و هاوپەیمانی یەكێتی خەڵكی نەینەوا و لیستی یەكێتی لە دیالە سەركەوتنی بەرچاویان لە هەڵبژاردنی ئەنجومەنی پارێزگاكانی عیراقدا بەدەستهێنا و لە دەنگدانی تایبەتیشدا لە پێش و پێشەنگن.

بەپێی زانیارییەكانی PUKMEDIA كە لە ئۆفیسی كۆمسیۆنی باڵای سەربەخۆی هەڵبژاردنەكانی عیراق لە كەركوك دەستیكەوتووە، 112 سندوقی دەنگدانی تایبەت لە كەركوك جیادەكرێتەوە و دەژمێردرێنەوە.

هەر بە گوێرەی زانیارییەكانی PUKMEDIA كە لە كۆمسیۆنی باڵای سەربەخۆی هەڵبژاردنەكانی عیراق دەستیكەوتووە: "2 هەزار و 38 وێستگەی دەنگدانی تایبەت لە عیراق ژماردنەوەی دەستیان بۆ دەكرێت".

"داتا و زانیاری لە ئۆفیسی شارەكان وەردەگرنەوە كە پڕۆسەی ژماردنەوەی دەستیان تێدا ئەنجامدەدرێت و دەنێردرێنەوە بۆ ئۆفیسی نیشتمانی و پاش تەواوبوونی پڕۆسەكەش ئەنجامی رەسمی رادەگەیەندرێت" سەرچاوەیەك لە كۆمسیۆنی باڵای سەربەخۆی هەڵبژاردنەكانی عیراق بۆ PUKMEDIA وایوت.


PUKMEDIA