شاڵاو کۆسرەت رەسوڵ: سەرکەوتنمان لەهەڵبژاردن ئەرکمان قورستر دەکات

PUKMEDIA

شاڵاو کۆسرەت رەسوڵ

یەکێتیی نیشتمانیی کوردستان جارێکی دیکە کوردستانیبوونی کەرکوک و ناوچە جێناکۆکەکانی بەدەنگی لایەنگرانی سەلماندەوەو ئەندامێکی مەکتەبی سیاسی یەکێتیش دەڵێت: "دەمانەوێت لەهەڵبژاردنی داهاتووی پەرلەمانی کوردستاندا وەک هەڵبژاردنی ئەنجومەنی پارێزگاکانی عیراق سەرکەوتن بەدەستبهێنین و باڵانسی سیاسی لە هەرێمیش راست بکەینەوە، ئەمەش بەکاری پێکەوەیی و پشتیوانی یەکتر دەبێت"، دەشڵێت: "سەرکەوتنمان لەهەڵبژاردن ئەرکمان بۆ خزمەتی خەڵک قورستر دەکات".

لە چەمچەماڵ کەرنەڤاڵێکی گەورە بۆ سەرکەوتنی لیست و هاوپەیمانێتییەکانی یەکێتیی نیشتمانیی کوردستان بەڕێوەچوو، تێیدا شاڵاو کۆسرەت رەسوڵ ئەندامی مەکتەبی سیاسی یەکێتیی نیشتمانیی کوردستان لە وتەیەکیدا بۆ ئامادەبووان و کادرانی یەکێتی رایگەیاند: "دوای ئەوەی سەرکەوتنی گەورەمان بۆ کورد و کوردستان لە ناوچە جێناکۆکەکان بە گشتی و لە کەرکوک بەتایبەتی بەدەستهێنا، لە ئەمڕۆوە ئەرکمان قورستر دەبێت و پێویستە پێکەوە توانا و هەوڵەکانمان بخەینە گەڕ بۆ خزمەتی کورد و هەموو پێکهاتەکانی دیکە لە ناوچە جێناکۆکەکان".

"بەڵێن دەدەین لەسەر رێبازەکەی سەرۆک مام جەلال کە چەپکە گوڵەکەیە، پێکەوە لەجێی ئەو متمانەیە بین کە پێمان سپێردراوە و لەداهاتوودا خزمەتی زیاتری کەرکوکییەکان و سەرجەم پێکهاتەکان لە ناوچە جێناکۆکەکان بکەین، خۆشحاڵین کە دوای ١٨ ساڵ توانیمان جارێکی تر بە دەنگەکانی ئێوە کوردستانیبوونی کەرکوک و ناوچە جێناکۆکەکان بسەلمێنینەوە، ئەمەش مەغرورمان ناکات، بەڵکو بە پێچەوانەوە ئەرکمان بۆ خزمەتی ئێوە قورستر دەکات"، شاڵاو کۆسرەت رەسوڵ وای وت.

ئەندامەکەی مەکتەبی سیاسی دەشڵێت: "پێکەوە بوونمان لەماوەی رابردوودا بۆ سەلماندنەوەی کوردستانیبوونی ناوچەجێناکۆکەکان بەڵگەیەکی حاشا هەڵنەگرە، کە دەتوانین هەر پێکەوە لە هەڵبژاردنی داهاتووی پەرلەمانی کوردستاندا سەرکەوین و باڵانسی سیاسی لەهەرێمی کوردستان راستبکەینەوە، چونکە یەکێتیی نیشتمانیی کوردستان بۆ خزمەت و ئازادی خەڵک دروستبووەو هەڵبژاردنی داهاتووش باشترین دەرفەتە کە بدرێت بە یەکێتی بۆ ئەوەی خزمەتی خەڵک بکات و کورد و کوردستان سەربخات".

PUKMEDIA