دەنگدانی تایبەت کۆتاییهات

PUKMEDIA

پرۆسەی دەنگدان

پرۆسەی دەنگدانی تایبەت بۆ هەڵبژاردنی ئەنجومەنی پارێزگاکانی عیراق بەبێ درێژکردنەوەی وادەکەی سەعات 6:00 ی ئێوارەی ئەمڕۆ 16-12-2023 کۆتایی هات، کە لە 15 پارێزگای عیراق بەڕێوەچوو، تێیدا زیاتر لە یەک ملیۆن دەنگدەر مافی دەنگدانیان هەبوو، لە سێ پارێزگاکەی هەرێمی کوردستانیش بنکەی دەنگدان بۆ دەنگدەری تایبەت و راگوێزراوەکان دانرابوو، بەپێی زانیاری سەرچاوە میدیاییەکان رێژەی بەشداری دەنگدانی تایبەت لە ئاستێکی بەرزدایە و هیچ جۆرە پێشێلکارییەکی ئەوتۆش تۆمارنەکراوە.

بەگوێرەی چاودێرانی یەکێتیی نیشتمانیی کوردستان لە وێستگە و بنکەکانی دەنگدان کە بە PUKMEDIA یان راگەیاند: "گرفتی نەخوێندنەوەی پەنجەمۆری دەنگدەر هەبووە، بەڵام بەرێژەیەکی کەم، کە کاریگەری لەسەر پرۆسەکە نەبووە و بەگشتیش  رێژەی بەشداری لە ئاستێکی بەرزدایە کەلە هەندێک ناوچە گەیشتوەتە 96٪.


بەگوێرەی زانیارییەكانی باوەڕپێكراوەكانی سایتی رەسمی یەكێتیی نیشتمانیی كوردستان PUKMEDIA كە لە كۆمسیۆنی باڵای سەربەخۆی هەرڵبژاردنەكانی عیراق و مەكتەبی هەڵبژاردنەكانی یەكێتیی نیشتمانیی كوردستانەوە وەریگرتووە، 1002393 دەنگدەری تایبەت لە هێزە ئەمنییەكان و ناوخۆ و سوپا لە سەرتاسەری عیراق مافی دەنگدانیان هەیە.

 پرۆسەی دەنگدانی تایبەت لەسەعات 7:00ی سەرلەبەیانیەوە لە 565 ناوەندی دەنگدان لە عیراق و هەرێمی كوردستان دەستیپێكردوو، بۆ چاودێری پرۆسەکە و رێگری لە هەر پێشێلکارییەک 11 هەزار کامێرای چاودێری لە بنکە و وێستگەکانی دەنگدان دانراون.


بۆ هەڵبژاردنی ئەنجومەنی پارێزگاكانی عیراق 134 لیست بەشداری هەڵبژاردنی ئەنجومەنی پارێزگاکانیان کرد، کە 39 هاوپەیمانی و 29 حزب و 66 کاندیدی سەربەخۆ بوون، کە نزیکەی 40 رۆژ بانگەشە بۆ لیست و کاندیدەکانیان بەردەوامبوو، هاوکات رۆژی دووشەممەش 18-12-2023 پرۆسەی دەنگدانی گشتی بەڕێوەدەچێت.

PUKMEDIA