بانگەشە کۆتایی هات و دەنگدان دەستپێدەکات

PUKMEDIA

پرۆسەی دەنگدان

ماوەی ٤٠ رۆژە کۆمسیۆنی باڵای سەربەخۆی هەڵبژاردنەکانی عیراق دەرگای بانگەشەی بەڕووی سەرجەم ئەو لیست و قەوارانەدا کردووەتەوە کە لە ١٥ پارێزگای عیراق جگە لە پارێزگاکانی هەرێم بەشداری هەڵبژاردنەکانی ئەنجومەنی پارێزگاکانی عیراقیان کردووە، سەعات ٦:٠٠ی سەرلەبەیانی ئەمڕۆش ئەو وادەیە کۆتاییهات و بانگەشەی هەلبژاردن راگیرا و هەر لایەن و کاندیدێکیش لە بانگەشە بەردەوام بێت روبەڕووی سزای یاسایی دەکرێتەوە.

دەنگدانی تایبەت دەستپێدەکات

بڕیارە سبەینێ شەممە ١٦-١٢-٢٠٢٣ لە سەعات ٧:٠٠ی بەیانییەوە دەنگدانی تایبەت بۆ راگوێزراو و هێزە ئەمنییەکان دەستپێبکات و تا ٦:٠٠ی ئێوارە بەردەوام بێت.

نزیکەی ٢ ملیۆن دەنگدەری تایبەت بەشداری دەنگدان دەکەن

بەپێی ئامارەکانی کۆمسیۆنیش ملیۆنێک و ٢ هەزار و ٣٩٣ دەنگدەری تایبەت و ٤٨ هەزار و ٢٦٠ راگوێزراو بەشداری هەڵبژاردنی ئەنجومەنی پارێگاکانی عیراق دەکەن و سەرجەم ئامادەکارییەکانیش بۆ ئەو مەبەستە تەوابووە.

دەنگدانی گشتی دەستپێدەکات

هاوکات رۆژی دووشەممە ١٨-١٢-٢٠٢٣ لەسەعات ٧:٠٠ی بەیانییەوە دەنگدانی گشتی لە ١٥ پارێزگاکەی عیراق بەڕیوەدەچێت و تا سەعات ٦:٠٠ی ئێوارە بەردەوام دەبێت.

نزیکەی ١٦ ملیۆن دەنگدەری گشتی بەشداری دەنگدان دەکەن 

بەپێی ئامارەکانی کۆمسیۆنیش ١٥ملیۆن و ١٠٨هەزار و ١٣٥ دەنگدەری گشتی بەشداری هەڵبژاردنی ئەنجومەنی پارێزگاکانی عیراق دەکەن و سەرجەم ئامادەکارییەکانیش بۆ ئەو مەبەستە تەوابووە.

نزیکەی ٨هەزار ناوەند و ٣٩ هەزار وێستگەی دەنگدان بۆ دەنگدەران ئامادەکراون

بەمەش ١٦ ملیۆن و ١٥٨ هەزار و ٧٨٨ دەنگدەر بە گشتی و تایبەت و راگوێزراوەوە بەشداری هەڵبژاردنەکانی ئەنجومەنی پارێزگاکانی عیراق دەکەن و ٧ هەزار و ٧٦٦ ناوەند و ٣٨ هەزار و ٤٠ وێستگەی دەنگدان بۆ دەنگدەران ئامادەکراوە.

لەهەڵبژاردنی ئەنجومەنی پارێزگاکانی عیراقدا بەپێی ئەو ئامارانەی کۆمسیۆنی هەڵبژاردنەکان ڕایرایگەیاندووە، 134 لیست بەشداری هەڵبژاردنی ئەنجومەنی پارێزگاکان دەکەن کە 39 هاوپەیمانی و 29 حزب و 66 کاندیدی سەربەخۆن،کە نزیکەی ٤٠ رۆژە بانگەشە بۆ لیست و کاندیدەکانیان دەکەن، سەرلەبەیانی ئەمڕۆش بەشێوەیەکی رەسمی لەلایەن کۆمسیۆنی باڵای سەربەخۆی هەڵبژاردنەکانی عیراقەوە بانگەشە راگیرا و سبەینێ ١٦-١٢-٢٠٢٣ دەنگدانی تایبەت دەستپێدەکات و رۆژی دووشەممە ١٨-١٢-٢٠٢٣ دەنگدانی گشت بەڕێوەدەچێت و کۆتایی بە هەڵبژاردنی ئەنجومەنی پارێگاکانی عیراق دێت.

PUKMEDIA