هاوپەیمانیی کەرکوک هێز و ئیرادەمانە دەنگەکانتان نافەوتێنێت

PUKMEDIA

هاوپەیمانیی کەرکوک هێز و ئیرادەمانە

ئەمڕۆ چوار شەممە ٢٩-١١-٢٠٢٣ لیستی ١٤٢ ی هاوپەیمانی كەركوك هێزی و ئیرادەمانە پەیامێكی بڵاوكردەوە و رایگەیاند: "تەنها هاوپەیمانیی کەرکوک هێز و ئیرادەمانە دەنگەکانمان نافەوتێنێت و خەساری ناکات، حەیفە بەناوی جیاجیاوە دەنگی زێرینی دەنگدەری کورد بە هەدەر بدرێت".

دەقی پەیامەكە:

پەیامی ئەمرۆ
دەنگی کورد بە هەدەر نەدەین دەنگدەران بە دەنگەکانیان دەتوانن هێز و ئیرادەی خۆیان بەرجەستە بکەن و شێوەی حکومڕانی لە کەرکوک دیاری بکەن.

ئیدارەی ئێستای کەرکوک ئیدارەیەکی ناکارا ، گەندەڵ و خۆسەپێن، جیاکار و شۆڤێنی و شپرزەیە لە هەموو رووییەکەوە. 

ئیدارەیەکە تێیدا  کورد ،کە زۆرینەی دانیشتوانە ، بێ رۆڵ و بێ بەشدارییە، تورکمان و مەسیحی و تەنانەت عەرەبی رەسەنیش لەقاودراون لە چاو عەرەبی تەعریب بە کۆن و نێویانەوە. هیچ سەنگیان نەماوە . بە کورتی ئیدارەیەکە گوزارشت لە ئیرادەی خەڵکەکەی ناکات. ئیتر ئەم ئیدارەیە بۆچی باشە؟ بۆ ئەوە نەبێت. کە بە دەنگ و دیموکراسیی رایماڵین و ئیدارەیەکی هەمەڕەنگ و ئیئتلافی بە سەرۆکایەتی پارێزگارێکی کوردپەروەر و کەرکوکیپەروەر  بخەینە جێگەی؟

ئەم ئەرکە دیموکراتییە ، نەتەوەییە، نیشتمانییە، کەرکوکییە هەر بە خۆمان دەکرێت. هەر بە دەنگدان و دەنگ دابین کردن و دەنگ کۆکردنەوە دەکرێت.

جا هەڵبژاردن پرۆسەیەکی ژیرانەیە، هۆنینەوەی ورد و لەسەر خۆی دەنک دەنک  مرواری دەنگەکانمان، دانە دانە و قلە قلەی هەناری دیموکراتییە تا نەرژێ و نەکەوێ و نەفلیقێتەوە لە ژێر پێی قەرەباڵەغی لیستەکاندا  .ئەرکی واش هەر چوونە سەر سندوقی دەنگدان نییە، بەڵکو ژیری و زیرەکی  بە هەدەرنەدانی دەنگەکانی کورد و دەنگەکانی دیموکراسییە.

ئەمەش هەر بە (هاوپەیمانیی کەرکوک هێز و ئیرادەمانە) دەکرێت، تەنها ئەم هاوپەیمانییە دەنگەکانمان نافەوتێنێ و خەساری ناکات. 

حەیفە بەناوی جیاجیاوە دەنگی زێرینی دەنگدەری کورد بە هەدەر بدرێ و بکەوێتە ژێرپێی قاسمی جەمع و تەرحەوە و بەس نەیاران کەڵکی لێوەر بگرن

PUKMEDIA