دامەزراوەی سەرۆک جەلال تاڵەبانی و زانکۆی قەیوان یاداشتنامە ئیمزادەکەن

PUKMEDIA

دامەزراوەی سەرۆک جەلال تاڵەبانی و زانکۆی قەیوان

دامەزراوەی سەرۆک جەلال تاڵەبانی (PJTF) و زانکۆی قەیوان یاداشتنامەی لێکتێگەیشتن ئیمزا دەکەن.

رۆژی دووشەممە رێکەوتی ١٦/١٠/٢٠٢٣ باڵیۆز د. محەمەد سابیر، سەرۆکی دامەزراوەی سەرۆك جەلال تاڵەبانی یاداشتنامەی لێکتێگەیشتنی لەگەڵ بەڕێز پ. ی. د. ئیسماعیل عەبدولڕەحمان، سەرۆکی زانکۆی قەیوانی نێودەوڵەتی ئیمزا کرد.

لە كۆبوونەوەیەكەدا باڵیۆز د. محەمەد سابیر، لەبارەی ئامانجی ئیمزاکردنی لێکتێگەیشتنی لەگەڵ زانکۆی قەیوانی نێودەوڵەتی وتی: " کارکردنی دامەزراوەی سەرۆك جەلال تاڵەبانی لە دیدگەی سەرۆک مام جەلالەوە سەرچاوەی گرتووە و دەیانەوێت رۆڵێکی بوونیادنەرانە لە ئاستی کۆمەڵگە بگێڕن، ئەم لێکتێگەیشتنە خزمەتگوزارییە پێویستییەکانی نێوان هەردوولا بە تایبەت لەبواری رۆشنبیری، توێژینەوە، ژینگە، کەلتووری، زانستی، گەشەی مرۆیی و ئاڵوگۆڕی زانیاری پڕدەکاتەوە".

بەڕێز پ. ی. د. ئیسماعیل عەبدولڕەحمان بەناوی خۆی و ئەنجومەنی زانكۆوه‌ بەخێرهاتنی دامەزراوەی سەرۆك جەلال تاڵەبانی کرد و رایگەیاند؛ "لە چوارچێوەی ئەم لێکتێگەیشتنەوە گرنگی بەبواری ئەکادیمی، توێژینەوە دەدرێت و دەبێتە هۆکاری زیاتری پشتیوانی ناوەندە زانستییەکان و دابینکردنی دەرفەتی کار".

سەرۆکی دامەزراوەی سەرۆك جەلال تاڵەبانی وتیشی: "ئەم لێکتێگەیشتنە بۆ پەرەپێدانی هاوبەشی ستراتیجییە لەنێوان دامەزراوەی سەرۆک جەلال تاڵەبانی و زانکۆی قەیوانی نێودەوڵەتی، هەروەها پشتگیریکردن لە پەرەپێدانی پرۆژەی هاوبەش لەبوارە هاوبەشەکاندا".

سەرۆکی دامەزراوەی سەرۆك جەلال تاڵەبانی باسی لەوەش کرد: " ئەم لێکتێگەیشتنە ئەزموون و پڕکردنەوەی کەلێنەکانە، لە ئاییندەیەکی نزیکدا بە هاوبەشی هەردوولا دەکەوێتە بواری جێبەجێ کردنەوە".

PUKMEDIA