ئەنجومەنی وەزیرانی هەرێم داوای كۆبوونەوەی لایەنە سیاسییەكان دەكات

ئەنجومەنی وەزیران

كۆبوونەوەی ئەنجومەنی وەزیرانی هەرێم

ئەنجومەنی وەزیران داوا لە حكومەتی فیدراڵ دەكات  شایستە داراییەكانی هەرێم بەو ژمارانەی لە خشتەكانی بودجەدا هاتوون بنێرێت، داواش لە هێز و لایەنە سیاسيیەكانی هەرێم دەكات كە: "یەكدەنگ  و یەكهەڵوێست بن و پێشنیاز دەكات: "كۆبوونەوەیەكی فراوانی هێز ولایەنە سیاسییەكانی هەرێم رێكبخرێت بۆ خستنەڕووی راستییەكان".

ئەم داوایانەی ئەنجومەنی وەزیرانی هەرێم لە كۆبوونەوەی ئاسایی هەفتانەدا هات كە رۆژی  2023/9/6 بە سەرپەرشتی مەسرور بارزانی سەرۆكی ئەنجومەنی وەزیران و ئامادەبوونی قوباد تاڵەبانی جێگری سەرۆك وەزیران،  بەرێوەچوو.

ئەنجومەنی وەزیران: مووچەی هەرێم لە ناو بودجەدا وەكخۆی خەرج بكرێت

بەگوێرەی راگەیەندراوی رۆژنامەوانی ئەنجومەنی وەزیران سەبارەت بە كۆبوونەوەكە بڵاوكراوەتەوە ئەنجومەنی وەزیران، "پرسە و سەرەخۆشی و هاوخەمی لەگەڵ بنەماڵە و كەسوكاری شەهیدانی رووداوەكانی كەركوك دەربڕی و بە توندی سەركۆنەی ئەو توندوتیژیەی كرد كە بەرامبەر هاووڵاتیانی سیڤلی كەركووك كرا".

ئەنجومەنی وەزیران داوا لە ئەنجومەنی وەزیرانی عیراق  دەكات:  "مووچەی هەرێم لە ناو بودجەی عیراق وەكخۆی خەرج بكرێت و بە پێی دەستوور و چوارچێوەی بنەمای یەكسانی لەبەرامبەر جێبەجێكردنی یاساكان رەفتاری لەگەڵ بكرێت".


ئەنجومەنی وەزیران داوای یەكدەنگی هێز و لایەنە سیاسیەكان دەكات

هەربەگوێرەی راگەیەندراوەكە ئەنجومەنی وەزیرانی هەرێم داوا لە هێز و لایەنە سیاسيیەكانی هەرێم دەكات كە: "یەكدەنگ  و یەكهەڵوێست بن لە داكۆكیكردن لە ماف و دەسەڵات و شایستە دەستوورییەكانی هەرێم" بۆیە  پێشنیاز دەكات: "كۆبوونەوەیەكی فراوانی هێز ولایەنە سیاسییەكانی هەرێم رێكبخرێت بۆ خستنەڕووی راستییەكان".

حكومەتی هەرێم: كۆمەڵگەی نێودەوڵەتی رێگە بە پێشێلكردنی مافی خەڵكی كوردستان نەدات


داوایەكی دیكەی ئەنجومەنی وەزیرانی هەرێم رووی لە كۆمەڵگەی نێودەوڵەتییە كە: "داوا لە كۆمەڵگەی نێودەوڵەتیش دەكات كە پشتیوانی هەرێمی كوردستان بن لە بەدەستهێنانی مافە دەستووریی و شایستە داراییەكانی بە پێی دەستوور و  رێككەوتنەكان و رێگە نەدەن چیتر مافەكانی خەڵكی كوردستان بە ناڕەوا پێشێل بكرێت".

 
PUKMEDIA