ئاسۆ مامەند بۆ دۆخی کەرکوک: بارەگایەک ئەوە ناهێنێت

PUKMEDIA

ئاسۆ مامەند

کارگێڕێکی مەکتەبی سیاسی یەکێتی لەبارەی دوایین رووداوەکانی کەرکوک و دروستبونی ئالۆزی دەدوێت و دەڵێت: "دروستبونی ئەم کێشانە لەئێستادا بەکاتێکی خراپدا دەڕوات و سەرکۆنەی ئەم گرژیانە دەکەین و دەڵێین بارەگایەک شایەنی دروستبونی گرژی و کێشەی نێوان کورد و عەرەب نیییە".

ئاسۆ مامەند کارگێڕی مەکتەبی سیاسی یەکێتیی نیشتمانیی کوردستان بۆ دروستبونی خۆپیشاندان و ئاڵۆزییەکانی دۆخی کەرکوک لەبەرنامەیەکی کەناڵی ئاسمانی کوردساتدا دەڵێت: "بەداخەوە کێشەی بارەگایەکی پارتی لە کەرکوک خۆپیشاندانی لێکەوتەوەو چەند رۆژە ئێمە هەوڵی ئەوە دەدەین کار لەسەر ئەوە بکەین چارەسەر بکرێت، کەبەداخەوە ئەمڕۆ شەهید و برینداری لێکەوتەوە".

"هەوڵەدەین کێشەکان لەگەڵ حکومەتی ناوەند چارەسەر بکەین و ئەم ئاڵۆزییە بەردەوام نەبێت و زیان بە خەڵکی کەرکوک نەگات"، ئاسۆ مامەند وای وت.

کارگێڕەکەی مەکتەبی سیاسی ئەوەش دەڵێت: "وەک یەکێتی هەموو هەوڵێک دەدەین بە نەهێشتنی گرژی و ئاڵۆزی لەکەرکوک، چونکە هیچ شوێن و بارەگایەک ئەوە ناهێنێت خوێنی منالێکی کورد برژێت، بەداخەوە کەلایەنێک کار لەسەر دروستکردنی گرژی و ئاڵۆزیی دەکات و تەقە دەکرێت تا خەڵکی بێتاوان بپێکرێن و ئەمانە هەمووی هەڵا و بانگەشەی هەڵبژاردنن".

دەشڵێت: "داوام لە کەرکوک و کەرکوکییەکان و خەڵکی خۆڕاگری کەرکوک هەیە نەکەونە ناو مەرامی خراپی چەند لایەن و گروپێک و داوا لە دەزگا ئەمنییەکان و لایەنە عیراقییەکان دەکەین کەبەزووی ئەم کێشەیە چارەسەر بکەن، ئەگەرنا هەڵوێستی توندمان دەبێت".

PUKMEDIA