وەزارەتی کشتوکاڵ و سەرچاوکانی ئاو روونکردنەوەیەک بڵاودەکاتەوە

ئاژانسەکان

وەزارەتی کشتوکاڵ و سەرچاوکانی ئاو

راگەیاندنی وەزارەتی کشتوکاڵ و سەرچاوکانی ئاو روونکردنەوەیەک بۆ میدیاکاران و رایی گشتی بڵاودەکاتەوە و تێیدا رایدەگەیەنێت:"هیچ جۆرە ناکۆکییەک لەسەر ستراتیژی بەرێوەبردنی ئاو نیە و ئەو بابەتانەی کە بڵاوبونەتەوە لە سۆشیاڵ میدیا هیچ بنەمایەکی دروستیان نیە".

دەقی روونکردنەوەکە:

بەڕێزان ...

بابەتێک بڵاوکراوەتەوە لە سۆشیاڵ میدیا سەبارەت بە چۆنیەتی مامەڵەکردنی هەرێمی کوردستان تایبەت بەدۆسیەی ئاو و گرتنەوەی ئاو لەگەڵ عیراق ،بۆ ڕای گشتی رایدەگەیەنین بە مەبەستی بەردەوامیدان بە پەیوەندیەکانمان ڕۆژی یەک شەممە 2023/8/27 ،کۆبونەوەی تایبەت هەبووە لە نێوان لێژنەی تایبەتمەندی وەزارەتی کشتوکاڵ و سەرچاوەکانی ئاوی حکومەتی هەرێم و وەزارەتی سەرچاوە ئاوییەکانی عیراق بۆ تاوتوێکردنی چۆنیەتی بەرێوەبردنی مەلەفی ئاو ، لەژێر ڕۆشنایی ئەو تێگەیشتن و هەماهەنگیانەی لە نێوان هەردوولادا هەیە.

هیچ جۆرە ناکۆکیەک لەسەر ستراتیژی بەرێوەبردنی ئاو نیە و ئەو بابەتانەی کە بڵاوبونەتەوە لە سۆشیاڵ میدیا هیچ بنەمایەکی دروستیان نیە، هیچ کۆبونەوەیەک هەڵنەوەشاوەتەوە لەسەر بنەمای ناکۆکی نێوان هەردوو وەزارەتی کشتوکاڵ و  سەرچاوەکانی ئاوی هەرێمی کوردستان و وەزارەتی سەرچاوە ئاوییەکانی عیراق، بە پێچەوانەوە پەیوەندییەکانمان لە ئاستێکی زۆر باشدان، لەپێناو پارێزگاری لە ئاسایشی ئاوی عیراق و هەرێم و بەیەکەوە کاردەکەین بە ئامانجی رووبەڕوبونەوەی ئاستەنگ و گۆرانکارییەکانی کەش و هەوا و کەمکردنەوەی کاریگەرییەکانی دیاردەی کەمبونەوەی ئاو بۆ سەر کەرتی کشتوکاڵ و هاووڵاتیان بەگشتی.

لەکۆتایدا ڕایدەگەیەنین کە مەلەفی ئاو بەپێی دەستور ڕێکخراوە لە نێوان حکومەتی هەرێمی کوردستان و حکومەتی فیدراڵ، بۆ ئەم مەبەستەش هەردوو وەزارەت پەیوەندییە هاوبەشەکانیان رێکخستووە و لە سەر بنەمای پێکەوە کارکردن بەردەوام دەبین.
           
 لەگەڵ ڕێزدا ....

راگەیاندنی وەزارەتی
کشتوکاڵ و سەرچاوکانی ئاو

PUKMEDIA