مەكتەبی سیاسی و سەركردایەتی لە هەولێر كۆدەبنەوە

PUKMEDIA

لۆگۆی یەكێتیی نیشتمانیی كوردستان

بڕیارە ئەمڕۆ 27-8-2023، بە سەرۆكایەتی بافڵ جەلال تاڵەبانی سەرۆكی یەكێتیی نیشتمانیی كوردستان، مەكتەبی سیاسی و ئەنجومەنی سەركردایەتی یەكێتی لە هەولێر كۆببنەوە.


ستران عەبدوڵڵا ئەندامی مەكتەبی سیاسی یەكێتیی نیشتمانیی كوردستان بە PUKMEDIA ی رایگەیاند: "لەكۆبوونەوەی مەكتەبی سیاسیدا گفتوگۆ لەسەر ئەو میكانیزم و رێكارانە دەكرێت كە كۆمسیۆنی باڵای پێنجەمین كۆنگرەی یەكێتی دەیانخاتەڕوو".

"بەڕێوەچوونی كۆبوونەوەكە لە ھەولێر، ئەوە دەگەیەنێت كە ھەولێر بۆ یەكێتیی نیشتمانیی كوردستان گرنگە و لەروی سیاسی و دیپلۆماسییەوە بایەختی تایبەتی ھەیە" ستران عەبدوڵڵا وادەڵێت.

هەر لەوبارەیەوە ئەحمەد زرار ئەندامی سەركردایەتی یەكێتیی نیشتمانیی كوردستان بە PUKMEDIA ی راگەیاند: "پاش كۆبوونەوەی مەكتەبی سیاسی، كۆبوونەوەی ئەنجومەنی سەركردایەتی هەر لە هەولێر بەڕێوەدەچێت و میكانیزمی ئەنجامدانی كۆنگرە بۆ ئەندامانی سەركردایەتی روون دەكرێتەوە".

"جگە لە پرسە ناوخۆییەكانی یەكێتی و هەرێمی كوردستان، چۆنییەتی بەشداریكردنی ئەندامانی كۆنگرە و رێكارەكانی بەڕێوەچوونی كۆنگرە تەوەرێكی دیكەی كۆبوونەوەكە دەبن" ئەحمەد زرار وادەڵێت.

ئەمەش لە كاتێكدایە لە كۆبوونەوەی رۆژی 20-8-2023 ی مەكتەبی سیاسی لە كەركوك، بڕیاردرا رۆژی 27-9 ی ئەمساڵ پێنجەمین كۆنگرەی یەكێتی ببەسترێت، هەروەها مەكتەبی سیاسی یەكێتی بڕیاریدا لەمەودوا كۆبوونەوەكانی مەكتەبی سیاسی و سەركردایەتی لە یەك شوێن ئەنجامنەدرێن و كۆبوونەوەی داهاتووی مەكتەبی سیاسی و سەركردایەتی لە هەولێر بن.

PUKMEDIA