مەكتەبی راگەیاندن یەكەمین پڕۆژەی كتێبی دەنگی بڵاودەكاتەوە

PUKMEDIA

كتێبی پانۆرامای راپەڕین 1991 و بارەگای مەكتەبی راگەیاندن

مەكتەبی راگەیاندنی یەكێتیی نیشتمانیی كوردستان، یەكەمین پڕۆژەی كتێبی دەنگی لەژێر ناوی (پڕۆژەی كتێبی دەنگی) بەشێوەی زنجیرە لە سۆشیاڵ میدیا و چەناڵی یوتیوبی (كتێبی دەنگی) بڵاودەكاتەوە.

ئەمیر عومەر خوێنەری (پڕۆژەی كتێبی دەنگی) لە لێدوانێكیدا بۆ سایتی رەسمی یەكێتیی نیشتمانیی كوردستان PUKMEDIA رایگەیاند: "(پڕۆژەی كتێبی دەنگی)، پڕۆژەیەكی مەكتەبی راگەیاندنە و هەموو ئەو كتێبانەی تێدا دەخوێندرێتەوە كە بایەخێكی گرنگیان هەیە و وەك دەستپێكیش كتێبی پانۆرامای راپەڕین 1991، دەخوێنینەوە".

"وەك ئاشكرایە دنیای سۆشیاڵمیدیا تەنگی بە خوێندنەوە هەڵچنیوە، بۆیە بەپێویستمان زانی ئەم پڕۆژەیە جێبەجێ بكەین و بەشێوەی زنجیرە لە سۆشیاڵمیدیا و چەناڵێكی یوتیوب بەناوی (كتێبی دەنگی) كە هاوبەشە لەگەڵ  PUKMEDIA بڵاویبكەینەوە" ئەمیر عومەر وادەڵێت.

راشیگەیاند: "جۆری كتێبەكان دیاریكراو نین، بەڵكو بەپێی گرنگیان هەڵدەبژێردرێن و بەم نزیكانەش دەست بە بڵاوكردنەوەی یەكەم كتێبی دەنگیمان دەكەین".

كتێبی پانۆرامای راپەڕین 1991  نوسینەوەیەكی راستگۆیانەی رووداوێكی گەورەو گرنگی كۆمەڵانی خەڵكی كوردستانە كەتێدا پاڵەوانی راستەقینە و درۆینە، هێزی كار و هێزی بار لێك جودا دەكاتەوە، كتێبەكە بەرهەمی مەكتەبی گەشەپێدانی بیر و هۆشیارییە و فەرید ئەسەسەرد ئامادەی كردووە.

پانۆرامای راپەڕین 1991 پەلاماردان و داگیركردنی كوەیت لەلایەن عیراق و هەڵوێستی ئەنجومەنی ئاسایش و ئەو بەرە بەرفراوانەی لەدژی وەستانەوە بە سەرەتای قۆناغێكی نوێ بەرەو راپەرینی بەهاری 1991 ی كۆمەڵانی خەڵكی كوردستان بەڕێبەرایەتی یەكێتیی نیشتمانیی كوردستان لەقەڵەم دەدات.

باس لەوەشدەكات دوو دڵی لایەنەكانی نێوبەرەی كوردستانی بۆ راپەڕین یەكێتی سارد ناكاتەوە و بە  ئەزموونی سەرۆك مام جەلال و خوێندنەوە بۆ دۆخەكە نەخشەی راپەرین دادەڕێژرێ و بە پێی پلانێكی پەسندكراوی كۆمیتەی سەركردایەتی، كوردستان بەسەر پێنج زۆن دابەش دەكات و بۆ هەر زۆنێكیش فەرماندەیەك دیاری دەكات.

هەربۆیە لەبەر گرنگی كتێبەكە بەشی "كتێبی دەنگی" مەكتەبی راگەیاندنی یەكێتیی نیشتمانیی كوردستان پانۆرامای راپەرین 1991 بە دەنگی ئەمیر عومەر دەكاتە كتێبێكی دەنگی.

PUKMEDIA