‎پەیامەكەی كاك بافڵ بۆ دكتۆر فەرهاد پیرباڵ

PUKMEDIA

عەبدوڵڵا سەكری

عەبدوڵڵا سەكری

‎پەیامەكەی كاك بافڵ تاڵەبانی بۆ پیرباڵ، بەشێكە لە میراتی ئازادی بیروڕا، كە یەكێتی زیاتر لە چل ساڵە پارێزگاری لەو میراتە سیاسییە دەكات و هەزاران شەهیدی لەپێناودا بەخشیوە.

‎ئایدیای سیاسی یەكێتی هەم وەك هێزێكی بەرگریكار لە ستراتیژ و هێڵە نەتەوەییەكان لە دەورانی شۆڕشی شاخدا، كە لەو پێناوەدا دەیان هەزار شەهیدی بەخشیوە، هەمیش وەك سەنگەرێكی بەرگری و خاوەن باكگراوندێكی دیموكراسی و سیكۆلار، دوای راپەڕین و خەباتی شارو دیموكراسیدا رۆڵێكی بەرچاوی هەبووەو ئەمڕۆش دەبینین بەكردەوە، بەمافی رەوای پیرباڵ و هەموو ئەوانەی هاوشێوەی فەرهاد پیرباڵ لەخەمی خەڵكەوە دەیانەوێت رەخنە لە دەسەڵاتی سیاسی بگرن  دەزانێت .

‎ مەسەلەی رەخنەو ئازادی بیروڕا، وەك مەودای عەقڵانی و لۆژیكی، یەكێكە لەو پرسە گرنگانەی یەكێتی بەگرنگییەوە لێی دەڕوانێت، ئەمەش لە ماوەی چەند دەیەی رابردوو مامەڵەی یەكێتی لەئاست ئەم پرسە گرنگە لەوەدا دەردەكەوێت كە لەڕێگەی دامەزراوە مەدەنی و رێكخراوە جەماوەری و سەنتەرو ناوەندە ئەكادیمی و رۆشنبیرییەكانییەوە، ئیشی لەسەر كردووە، هەم لەئاستی پەروەردەی تاك و هەمیش لەئاستی پەروەردەی خێزانەوە، لەڕووی ئیداریشەوە هەوڵی داوە كە بنەماكانی دیموكراسی و ئازادی، وەك بنەمای كاری ستراتیژی لە حكومڕانیدا ئیشی لەسەر بكات، لەم پێناوەشدا چەندین كۆسپ و لەمپەر هاتووەتە ڕێگەی، كە هەمان ئەو كۆسپ و لەمپەرانەن مێژوویەكی دوورودرێژە، رێگرن لە گەشەی دیموكراسی لە ژمارەیەك لە وڵاتانی تری رۆژهەڵاتی ناوەڕاستدا.

‎پەیامەكە ئاماژەیەكی روونە كە یەكێتی دەیەوێت، ئازادی و ئازادی بیروڕا بباتە قۆناغێكی تازەو باڵاترو سستبوونی گۆڕانكاری و پابەندێتی كۆمەڵایەتی بە عەقڵی خێڵگەرایی لە كۆمەڵگادا كەم بكاتەوە.

PUKMEDIA