قوباد تاڵەبانی: ئەزموونی ژاپۆن لەهەموو جیهاندا سەرکەوتووە

نوسینگەی رۆژنامەوانی قوباد تاڵەبانی

قوباد تاڵەبانی و باڵیۆزی ژاپۆن لەعیراق

قوباد تاڵەبانی، جێگری سەرۆک وەزیران پێشوازیکرد لە فوتۆشی ماتسومۆتۆ باڵیۆزی ژاپۆن لە عیراق و لە کۆبوونەوەی نێوانیاندا دواپێشهاتە سیاسییەکانی کوردستان و عێراق و چۆنییەتی پەرەپێدانی پەیوەندییەکانی نێوان هەرێمی کوردستان و وڵاتی ژاپۆن تاوتوێکران.

لە کۆبوونەوەکەدا کە ئەمڕۆ ١٠ی ئابی ٢٠٢٣ لە هەولێر بەڕێوەچوو، دابان شەدەڵە جێگری بەرپرسی فەرمانگەی پەیوەندییەکانی دەرەوە ئامادەیبوو، قوباد تاڵەبانی بەهۆی هاوکارییەکانی بۆ هەرێمی کوردستان لە بنیاتنانی ژێرخانی ئابوری و خزمەتگوزاری سوپاسی حکومەتی ژاپۆنی کرد و رایگەیاند: "ئەزمونی ژاپۆن لە گەشەسەندندا نمونەیەکی دیار و سەرکەتووە لەسەر ئاستی جیهان و پێویستە عیراق و هەرێم لە ئیدارەدانی سێکتەرە جیاوازەکاندا سود لە ئەزمونی ئەو وڵاتە ببینن".

 جێگری سەرۆک وەزیران ئامادەیی حکومەتی هەرێمی دەربڕی بۆ بەهێزترکردنی پەیوەندییەکانی نێوان هەردوو وڵات بە تایبەتیش لە بوارەکانی بازرگانی و خوێندنی باڵادا.

لە کۆبوونەوەکەدا هەردوولا هاوڕابوون کە  لەپێناو سەقامگیری عیراق و کوردستان و رەخساندنی زەمینەی گونجاو بۆ گەشەسەندنی ئابوری، پێویستە هەم کێشەکانی نێوان هەرێم و بەغدا و هەم ناکۆکییە سیاسییەکانی نێوان لایەنە سیاسییەکان لە کوردستان و عیراق لەڕێگەی گفتوگۆوە چارەسەر بکرێن.

PUKMEDIA