قوباد تاڵەبانی: بەرژەوەندی چەند كەسێك چاكسازی لە هێزەكانی پێشمەرگە پەكنەخات

نووسینگەی قوباد تاڵەبانی

قوباد تاڵەبانی جێگری سەرۆك وەزیران

قوباد تاڵەبانی، جێگری سەرۆك وەزیران لە كۆبوونەوەی لەگەڵ لیوا روكن بەختیار ئەمینداری گشتی وەزارەتی پێشمەرگە و ژمارەیەك لە ئەفسەران و پلەداری وەزارەت رایگەیاند: "بەردەوام دەبین لە چاكسازی لە وەزارەتی پێشمەرگە و هەر كەس و بەرپرسێك كەمتەرخەم بێت لێپرسینەوەی لەگەڵدا دەكرێت".

لە كۆبوونەوەكەدا كە رۆژی 9-8-2023 لە هەولێر بەڕێوەچوو، تاوتوێی دواپێشهات و گرژی و ناكۆكییەكانی ناو دیوانی وەزارەت كرا، لەسەر داوای قوباد تاڵەبانی، ئەمینداری گشتی وەزارەتی پێشمەرگە باسی لە گرژییەكان و هۆكارەكانی كرد و هەروەها روونكردنەوەی دا لەبارەی چۆنییەتی بەڕێوەچوونی قۆناغەكانی چاكسازی لە وەزارەتی پێشمەرگە و كێشە و كەموكوڕییەكانی پڕۆسەكەی خستەڕوو.

جێگری سەرۆك وەزیران لە كۆبوونەوەكەدا جەختی لەسەر بەردەوامیدان بە پڕۆسەی چاكسازی و رێكخستنەوەی هێزەكانی پێشمەرگە كردەوە و رایگەیاند: :ئاساییە گرژی و ناكۆكی سیاسی هەبێت لەنێوان لایەنە سیاسییەكان بەڵام قبوڵ كراو نییە ئەو گرژییە بهێنرێتە ناو وەزارەتی پێشمەرگە".

وتیشی: "بەڵێنمان بە خەڵكی خۆمان و هاوپەیمانەكانیشمان داوە كە، هێزەكانمان تۆكمەتر و راهێنراوتر بكەین و قۆناغ بە قۆناغ پڕۆژەی چاكسازی جێبەجێ بكەین، هەربۆیە ناكرێت لەپێناو بەرژەوەندی هەندێك كەس، دەستبەرداری بابەتێكی وەها هەستیار و گرنگ بین، ئێمە بەردەوام دەبین لە پڕۆسەی چاكسازی و لێپرسینەوەش لە كەسانی كەمتەرخەم دەكەین لە هەر پلەو پۆستێكدا بن".

جێگری سەرۆك وەزیران  لە كۆبوونەوەكەدا پەیامێكی بۆ هەموو بەرپرسان و پلەدارانی وەزارەتی پێشمەرگە نارد و رایگەیاند: "لەڕووی سیاسی و حیزبییەوە سەر بە هەر لایەنێكن، لەڕووی نیشتمانی و ئەخلاقییەوە ئەركی ئێوەیە لە وەزارەت پیشەییانە مامەڵە بكەن و دووربكەونەوە لە ململانێ و نەبنە بەشێك لە ناكۆكی سیاسی و حیزبی و مل نەدەن بۆ هیچ دەستێوەردانێك لە وەزارەتی پێشمەرگە لەلایەن هەر كەسێكەوە بێت".

لە كۆبوونەوەكە، قوباد تاڵەبانی ستایشی ئەمینداری گشتی وەزارەتی پێشمەرگە و تیمی یاوەری كرد كە لەماوەی رابردوو زۆر بەسەبر و پەرۆشەوە كاریان كردووە لەپێناو كۆنتڕۆڵكردنی دۆخی ناو وەزارەت و هەموو هەوڵێكیان داوە پرۆسەی چاكسازی بەتەواوەتی پەك نەخرێت.

PUKMEDIA