وەفدێکی یەکێتی بەشداری ساڵیادی جینۆسایدی ئێزدییەکان لە شەنگال دەکات

PUKMEDIA

بەشداریکردنی وەفدەکەی یەکێتی لە نۆیەمین ساڵیادی جینۆسایدی ئێزدییان

وەفدێکی یەکێتیی نیشتمانیی کوردستان بەشداری مەراسیمی نۆیەمین ساڵیادی جینۆسایدی ئێزدییانی لە ناحیەی سنونێ و خانە سۆری کرد لە قەزای شەنگاڵ.

رۆژی ٣ئاب ٢٠٢٣ وەفدێکی یەکێتی کە پێکھاتبوون لە ئاراس محەمەد ئاغا لێپرسراوی مەڵبەندی حەوتی رێکخستنی نەینەوا و داود شێخ جوندی ئەندامی ئەنجومەنی سەرکردایەتی و لێپرسراوی مەڵبەندی رێکخستنی شەنگال و عەلی عمر گەبعۆ یاریدەدەری پارێزگاری نەینەوا و هەڤاڵانی ھەردوو مەڵبەند بەشداریان کرد لە مەراسیمی نۆیەمین ساڵیادی جینۆسایدی ئێزدییان لە ناحیەی سنونێ وخانە سۆر _ قەزای شەنگاڵ.

لە مەراسیمەکەدا کە لێپرسراوانی حکومی و حزبی و کەسایەتی ئێزدی ئامادەیبوون وەفدی یەکێتی پەیامی سەرۆکایەتی یەکێتیان پێشکەشکرد و رایگەیاند: "نۆ ساڵ بەسەر کارەساتی شەنگاڵ و دەوروبەری تێدەپەڕێت، تا ئێستا خوشڪ و برا ئێزدییەکانمان لە کەمپەکاندان و لە ڕەوشێکی خراپدان و هیچ هەوڵێک نەدراوە بۆ ئاوەدانکردنەوەی  ناوچەکانیان".

لە پەیامەکەی وەفدی یەکێتی ھاتووە : "بە خەمێکی قولەوە یادی داگیرکردنی شەنگال و جینوسایدکردنی خوشک و برا ئێزدیەکانمان دەکەینەوە، کە برینێکی قوڵە لە ویژدانی مرۆڤایەتیماندا ".

لەپەیامەدا هاتووە: "ئەمرۆ نۆ ساڵ بەسەر ئەو کارەساتە دا تێدەپەڕێت کە بەسەر خەڵکی شەنگال و دەوروبەری هات کەتا ئێستاش خوشک و برا ئێزدیەکانمان لە کەمپەکان دەژین دوور لە ماڵ و زێدی باوباپیری خۆیان، ژیانێکی ناخۆش وبە ئازار بەرێ دەکەن لە کەمپەکاندا ". "ئێستاش چارەنووسی سەدان کچ و ژنی ئێزدیەکان لە نیو دەستی تیرورستانی داعش نادیارە، بۆیە داوا لە حکومەتی هەرێمی کوردستان و حکومەتی عیراق دەکەین هەوڵی زیاتر بدەن بۆ  رزگارکردنیان و ئاوەدانکردنەوەی  قەزای شەنگال  وگوندەکانی دەوروبەری".

پەیامەکە ئاماژەی بەوەشدابوو: "داوا لەهەموو لایەنەکان دەکات پێکەوە  هەنگاوی جدی  بنێن بۆ ئەوەی لە نێو کۆمەلگای نیودەولەتی  کۆمەلکوژی و کارەساتی  شنگاڵ  بە جینوساید بناسێندرێ" .

لە کۆتایی پەیامی وەفدی یەکێتی ھاتووە:" یەکێتی ھەمیشە لە خەمی ئێزدیەکاندایە و بۆخزمەتکردنیانیش ھەمیشە ئامادەیە، پشتگیری و پشتیوانی خۆیان بۆ ئێزدیەکان".
PUKMEDIA