مەڵبەندی هەولێر: یادی ئەنفالی بارزانییەكان ببێتە هۆكاری یەكڕیزیمان

PUKMEDIA

یەكێتیی نیشتمانیی كوردستان

مەڵبەندی 3 ی هەولێر لەبیرەوەری 40 ساڵەی مەرگەساتی  كۆمەڵكوژی بارزانییەكاندا پەیامێك بڵاودەكاتەوە و رایدەگەیەنێت: "هیواخوازین ئەم یادە هاندەرمان بێت بۆ تەبایی و یەكڕیزی و یەكهەڵوێستی گەلەكەمان".

دەقی راگەیەندراوەكە: 

40 ساڵ لەمەوبەر  رژێمی بەعسی عەرەبی ئیشتراكی  لە 1983/7/31 تاوانێكی دڕندانەی بەرامبەر بە گەلەكەمان ئەنجامدا و لە یەك كاتدا 8000 هاووڵاتی كوردی بارزانی راپێچی مەرگێكی نادیار و بێ سەرو شوێن و زیندە بەچاڵكرد .

ئەو تاوانەش لەدرێژەی ئەو تاوانانەبوو، كە رژێمی لەناوچووی بەعس لە چوارچێوەی سیاسەتی لەناوبردنی گەلی كورد ئەنجامیدان، ئەم تاوانە دوابەدوای قوناغی یەكەمی ئەو بەرنامە ترسناكانە هات كە بە راگواستنی بارزانییەكان لە زێدی باو باپیرانیان دەستی پێكرد و لە كۆمەڵگە زۆرەملێیەكانی بەحركەو قوشتەپە و حەریردا جێگیری كردن .

پێشتریش رژێمی بەعس بە سێ قوناغ، خەڵكی مەدەنی ناوچە سنوورییەكانی راگواستبوو .

لە رۆژی 1983/7/31 رژێمی بەعس گەمارۆی كۆمەڵگاكانی قوشتەپە و بەحركە و حەریری لە سنووری پاریزگای هەولێر دا كەپێشتر لە چوارچێوەی بەرنامەڕێژیدا بۆ تاوانێكی وا دڕندانە داڕشتبوو، كە سەرجەم گەنج و لاو و پیاوانی بارزانییەكانی راپێچی چارەنووسێكی نادیاری كردن .

هەر دوای ماوەیەكی كەم لە بیابانەكانی سەماوە زیندەبەچاڵی كردن و بەداخەوە تا ئێستا چارەنووسی زۆربەیان نادیارە و تەنانەت روفاتی زۆرینەشیان نەدۆزراوەتەوە .

لەبیرەوەری ئەنفالكردنی بارزانییەكاندا، سەری رێز لەبەردەم  شەهیدانی ئەنفالی بارزانییەكان و سەرجەم شەهیدانی كوردستان  دادەنەوێنین و هاوخەمی خۆمان بە كەس وكاری و خانەواودەی قوربانیانییەكان رادەگەیەنین. هیواخوازین ئەم یادە هاندەرمان بێت بۆ تەبایی و یەكڕیزی و یەكهەڵوێستی گەلەكەمان.

هەر لەم یادەوەریە خەمگینەدا، دووبارە سوپاسی هەڵوێستی نەتەوەییانەو جوامێرانەی كۆمەڵانی خەڵكی شاری هەولێری خۆشەویست دەكەین، كە لەم سەردەمەدا هاوخەم و هاوكاری خانەوادەی ئەنفالكراوانی كوردانی بارزانی بوون.

یەكێتیی نیشتمانیی كوردستان
 مەڵبەندی 3 ی هەولێر 

PUKMEDIA