لە سلێمانییەوە داوای ئازادکردنی شێروان شێروانی دەکرێت

PUKMEDIA

گردبوونەوەی ناڕەزایی هاووڵاتییانی سلێمانی دژی بڕیاری سزادانەوەی شێروان شێروانی

بە بەشداری ژمارەیەک لە رۆژنامەنووسان و رۆشنبیران و چالاکوان و هاووڵاتیانی سلێمانی، لە باخی گشتی سلێمانی گردبوونەوەی ناڕەزایی دژی بڕیاری دووبارە سزادانەوەی رۆژنامەنووس شێروان شێروانی ئەنجامدرا.

لە گردبوونەوەکەدا بەیاننامەیەک خوێندرایەوە و تێیدا ئەوەخرایەڕوو: "دەبێت خەڵکی کوردستان پشتیوان و هەماهەنگی یەکتربن و کەسانی پێشەنگی ئەم کۆمەڵگەیە بەتەنها بەرامبەر دەسەڵات جێنەهێڵن".

لە بەیاننامەکەشدا هاتبوو: "ئەمەی روودەدات لە بادینان، سەرەتایەکی مەترسیدارە بۆسەر ژیانی تەواوی ئازادیخوازان و هەوڵێکە بۆ فراوانبوونی دەسەڵاتی تاکە کەسی بەسەر تەواوی جومگەکانی حکومڕانی و ژیانی کۆمەڵایەتی ئێمەوە، ئەمەش وادەکات کەسمان پارێزراو نەبین و هەر رۆژەو کەسێکمان لە زیندان بین، بۆیە کاتی هەڵوێستە بەرامبەر ئەم تاکڕەوییە".

لە بەیاننامەکەدا داوای دەستبەجێ ئازادبوونی شێروان شێروانی و هاوڕیکانی کرا و داواشکرا شکۆ بۆ یاسا و سەربەخۆبوونی دەسەڵاتی دادوەری بگەڕێتەوە، هەروەها داواشیان لە خەڵکی بەویژدانی کوردستان کرد چیتر بێدەنگ نەبن و دەنگ هەڵبڕن و خاوەنی هەڵوێست بن.
PUKMEDIA