چلەی زستان و ئەنجامدانی هەڵبژاردن لەهەرێم?!.

PUKMEDIA

لەتیف نێروەیی

لەتیف نێروەیی

پێشنیاركردن بۆ دیاریكردنی رۆژی ئەنجامدانی هەڵبژاردنی پەرلەمانی كوردستان لە رۆژی 18/2/2024 پێدەچێت لەژێر گۆشارێكی زۆر دابێت، ئەگینا كۆمیسیۆن چاك دەزانێت مانگی (2) چلەی زستانە و زۆربەی ساڵەكان بەهۆی بەفربارینێكی زۆر و نزمبوونی پلەی گەرما بۆ ژێر سفر هاتوچۆ لە نێوان شاروشاروچەكان و دێهاتەكانی هەرێمی كوردستان دا نامێنێت و زۆر جار لەناو خودی شارەكانیشدا،  دەوامی رەسمی نامێنێت و دەكرێتە پشۆی رەسمی.

 هەروەها لەو مەوسمەدا ئەگەر بەفریش نەبارێت، بەڵام بەهۆی سەرماو سوڵەوە هاووڵاتیانی بەتەمەن و نەخۆش و كەمئەندامان لەمافی دەنگدان بێ بەش دەبن، جگە لەوە ئەگەر بەفر ببارێت ئەوا بەهۆی ئەو رەوشەوە، دەنگدەران و تیمەكانی كۆمیسیۆنی هەڵبژاردنەكان و تیمەكانی راگەیاندن و چاودێرانی سەر سندوقەكانی دەنگدان و نوێنەری قەوارە سیاسییەكان و چاودێرانی رێكخراوەكانی كۆمەڵگای مەدەنی و چاودێرانی رێكخراوە نێودەوڵەتییەكان ناتوانن ئەركەكانی خۆیان بەسەركەوتووی جێبەجێ بكەن و لەوانەشە لەچەندین شوێن پڕۆسەی دەنگدان بەهۆی كەش و هەواوە بەتەواوەتی پەك بكەوێت.

جگەلەوە بۆ كۆمیسیۆنی باڵای سەربەخۆ هەڵبژاردنەكانی عیراق جۆرێك لە ئەستەمی یە كە بتوانێت تەنها كەمتر لە دوو مانگ لەدوای هەڵبژاردنەكانی ئەنجۆمەنی پارێزگاكانی عیراق ئامادەكاری بكات بۆ ئەنجامدانی هەڵبژاردنی پەرلەمانی كوردستان، بۆیە سەرۆكایەتی هەرێمی كۆردستان دەتوانێت ئەم پرسە بە ئەرێنی یان نەرێنی یەكلا بكاتەوە و دەكەوێتە بەردەم بەرپرسیارەتییەكی مێژویی لە پەسەندكردنی ئەو وادە پێشنیاركراوە  یان دیاریكردنی كاتێكی  گونجاوتر.

PUKMEDIA