پەرلەمانتارێکی یەکێتی داوادەکات خوێندنەوەی سێهەم بۆ بەپارێزگابوونی هەڵەبجە بکرێت

PUKMEDIA

مۆنۆمێنتی هەڵەبجە و نووسراوی چرۆ حەمەشەریف بۆ خوێندنەوەی سێهەم بۆ پرۆژەیاسای بەپارێزگابوونی هەڵەبجە

ئەندامێکی فراکسیۆنی یەکێتیی لە ئەنجومەنی نوێنەرانی عیراق داوا لە سەرۆکایەتی پەرلەمان دەکات خوێندنەوەی سێهەم بۆ پرۆژەیاسای بەپارێزگابوونی هەڵەبجە بخاتە کارنامەی دانیشتنەکانی پەرلەمانەوە.

چرۆ حەمەشەریف ئەندامی ئەنجومەنی نوێنەرانی عیراق لە فراکسیۆنی یەکێتی بە سایتی رەسمی یەکێتیی نیشتمانیی کوردستان PUKMEDIA ی راگەیاند: "ئەمڕۆ لە یەکەم دەستپێکردنەوەی دانیشتنەکانی ئەنجومەنی نوێنەرانی عیراق دا، داوام کرد کە سەرۆکایەتی پەرلەمان پڕۆژەی بەپارێزگابوونی هەڵەبجە بخاتە کارنامەی دانیشتنەکانی پەرلەمانەوە".

"داواشم کردووە لەماوەیەکی نزیکدا پڕۆژەکە لە پەرلەمان خوێندنەوەی سێهەمی بۆبکرێت و پرسی بەپارێزگابوونی هەڵەبجە بەڕەسمی کۆتایی پێبهێندرێت و هەڵەبجە ببێتە ١٩ـەمین پارێزگای عیراق، لەوچوارچێوەیەشدا سەرۆکی پەرلەمان لیژنەیەکی بۆ ئەوپرسە راسپارد کە بەدەم داواکەمەوە بێن و خوێندنەوەی سێهەمی بەپارێزگابوونی هەڵەبجە بخرێتە کارنامەی دانیشتنی پەرلەمانەوە"، چرۆ حەمەشەریف وادەڵێت.

ئەمەش لەکاتێکدایە لە هەفتەی رابردوودا وەزارەتی پلاندانانی عیراق بەڕەسمی سنووری جوگرافیای پارێزگای هەڵەبجەی وە یەکێک لە جێبەجێکردنی رێکارەکانی بەپارێزگابوونی هەڵەبجە دیاریکرد و ئەوەی کە ماوەتەوە تەنها خوێندنەوەی سێهەمە بۆ پڕۆژەیاساکە لە ئەنجومەنی نوێنەرانی عیراق بۆئەوەی هەڵەبجە بەڕەسمی ببێتە پارێزگایەکی نوێی عیراق.
PUKMEDIA

دەقی داواکارییەکەی ئەندامەکەی فراکسیۆنی یەکێتی بۆ سەرۆکایەتی پەرلەمانی عیراق