وتەبێژی فراکسیۆنی یەکێتی: گەلی عیراق چاوەڕوانی بودجەیە

PUKMEDIA

سۆزان مەنسوڕ وتەبێژی فراکسیۆنی یەکێتی

دوای یاسای بودجە عیراق پاکتاوی قەرز و پارەکانی لەگەڵ هەرێم دەکات و وتەبێژی فراکسیۆنی یەکێتیش لە ئەنجومەنی نوێنەرانی عیراق دەڵێت: "خستنەبواری جێبەجێکردنی یاسای بودجەش بۆ خەڵکی عیراق گرنگی خۆی هەیە و تاکاتی جێبەجێکردنیشی مووچەی فەرمانبەرانی هەرێم و عیراق لەدەرەوەی یاساکە دەنێردرێت".

سۆزان مەنسوڕ وتەبێژی فراکسیۆنی یەکێتی لە ئەنجومەنی نوێنەرانی عیراق بە سایتی رەسمی یەکێتیی نیشتمانیی کوردستان PUKMEDIA ی راگەیاند: "لەگەڵ ئەوەی لەلایەن سەرۆک وەزیرانی عیراقەوە سکاڵا لەسەر یاسای بودجە هەیە، بەڵام رێکارەکانی یاساکە تەواو بوەو لەماوەیەکی نزیکدا دەچێتە بواری جێبەجێکردنەوە".

"چاوەڕواندەکرێت دابەشکردنی مووچەی مانگی تەمووزی فەرمانبەرانی عیراق و مووچەی مانگی حوزەیرانی فەرمانبەرانی هەرێم لەدەرەوەی یاساکە دابەشبکرێت، واتە وەک مانگەکانی پێشوو بڕێک پارە بۆ هەرێم دەنێردرێت بۆ دابەشکردنی مووچە، پاشان دوای کەوتنە بواری جێبەجێکردنی یاساکە حکومەتی عیراق ئەوە بڕە پارانەی ناردویەتی بۆ هەرێم پاکتاوی دەکات"، سۆزان مەنسوڕ وای وت.

وتەبێژەکەی یەکێتی لە ئەنجومەنی نوێنەران دەشڵێت: "خەڵکی عیراق پێویستی بەخستنە بواری جێبەجێکردنی یاسای بودجە هەیە و یاساکە دەتوانێت دەرگای خزمەتگوزاری بەڕوی هاوڵاتیاندا بکاتەوە، ئەمە جگە لەوەی دەتوانێت رێژەی بێکاری کەم بکاتەوەو هەلی کاری زیاتر بڕەخسێنێت، هەر ئەمەشە وای کردووە گەلی عیراق بە گەشبینییەوە لە یاساکە بڕوانن و چاوەڕوانی جێبەجێکردنی بکەن".

PUKMEDIA