سەرۆک بافڵ: پێشوازی لە یەکخستنەوەی پێشمەرگە دەکەین

نووسینگەی سەرۆكی یەكێتی

كۆبوونەوەی سەرۆك بافڵ لەگەڵ فەرماندە و ئەفسەری باڵای یەکە سەربازییەکان

بافڵ جەلال تاڵەبانی، سەرۆکی یەکێتیی نیشتمانیی کوردستان لە بارەگای بەڕێوەبەرایەتی گشتی دژەتیرۆر لەگەڵ ژمارەیەک فەرماندە و ئەفسەری باڵای یەکە سەربازییەکان کۆبووەوە.

لەکۆبوونەوەکەدا کە شاڵاو کۆسرەت رەسوڵ، بورهان سەعید سۆفی، ئەندامی مەکتەبی سیاسی و وەستا رەسوڵ، لێپرسراوی مەڵبەندی رێکخستنی پێشمەرگە و لیوا روکن عومەر ساڵح، سەرۆکی دەستەی ئەرکانی هێزەکانی 70 ئامادەبوون، دۆخی ئەمنی و هەنگاوەکانی رێکخستنەوە و پێشخستنی توانای هێزەکانی پێشمەرگە گفتوگۆی لەبارەوەکرا و جەخت لە یەکخستنی هەوڵەکان کرایەوە لەپێناو سەرخستنی ئەو ئامانجە نیشتمانییە.

سەرۆک بافڵ جەلال تاڵەبانی لەبارەی دوایین هەنگاو و بڕیارەکانی رێکخستنەوە و چاکسازیکردن و درێژەدان بەمەشق و راهێنان و  بەرزکردنەوەی توانای سەربازی و هەواڵگری هێزی پێشمەرگە ئامادەبووانی بەرچاوڕوونکرد و رایگەیاند، هەموو هەوڵەکان بە ئاڕاستەی رێکخستنەوەی هێزەکان و ئامادەکردنەوەیەتی لەچوارچێوەی پەیکەربەندییەکی نوێدا تاوەکو هێزێکی نیشتمانیی تۆکمە بونیاد بنێین کە پارێزەری راستەقینەی بەرژەوەندییە نیشتمانییەکان بێت .وتیشی پێشوازی لە هەنگاوەکانی یەکخستنەوەی هێزەکانی پێشمەرگە دەکەین لە سەر بنەمای  یەکسانی و دادپەروەریی و هاوسەنگی هێز هەر ویستێکیش لەدەرەوەی  ئەم ئامانجە باڵایە رەت دەکەینەوە، بۆیە پێویستە هەموو فەرماندە و ئەفسەرەکانی هێزی پێشمەرگە بە ئەوپەڕی دڵسۆزییەوە ئەرکەکانیان جێبەجێ بکەن و وەک هەمیشە لەخزمەت کوردستاندا بن.

لەبارەی هاریکاری و هەماهەنگی نێوان کۆی هێزە سەربازی و ئەمنییەکان و یەکخستنی هەوڵەکانیان بۆ پاراستنی ئاسایش و سەقامگیری، سەرۆک بافڵ رایگەیاند، دەبێت هەموو هێزە سەربازی و ئەمنییەکان هاوکار و هەماهەنگبن، پێکەوە لەچوارچێوەی یاسا بەرکارەکاندا ئەرکەکانیان رابپەڕێنن و پارێزەری ژیانی خەڵک بن.

پاراستنی سنوورەکان، تۆکمەکردنی سەنگەرەکانی هێزی پێشمەرگە و رووبەڕووبوونەوەی تیرۆر تەوەرێکیتری کۆبوونەوەکە بوو و جگەلەوەی گفتوگۆی وردی لەبارەوەکرا، بڕیاری پێویستیشیان لەبارەوە درا.

PUKMEDIA