بەدواداچوون بۆ سەركەوتنی هەڵمەتی رواندنی یەك ملیۆن نەمام دەكرێت

PUKMEDIA

بەدواداچوون بۆ سەركەوتنی هەڵمەتی رواندنی یەك ملیۆن نەمام دەكرێت

لەچوارچێوەی كارەكانی هەڵمەتی رواندنی یەك ملیۆنی نەمام، لەسەر بڕیار و راسپاردەی بافڵ جەلال تاڵەبانی سەرۆكی یەكێتیی نیشتمانیی كوردستان، ئەمڕۆ كارەكانی دوو پڕۆژەی گرنگی دارستانی بەسەركرایەوە.

لەوبارەیەوە حسێن حەمەكەریم نوێنەری نوسینگەی سەرۆك بافڵ رایگەیاند: "دەستمان بەبەدواداچوونەكانمان كردووە، بۆ زانینی شێوازی بەڕێوەچوونی كارەكانی خزمەت و پاراستنی نەمامەكان كەلەلایەن بەڕێوەبەرایەتی دارستان و پاوانی سلێمانییەوە جێ بەجێ دەكرێت، بۆ ئەو مەبەستەش سەردانی پڕۆژەی دارستانی قەرەهەنجیرمان كرد كەتێبینی گەشەی بەرچاوی نەمامەكانمان كرد بەوپێیەی ئاوی بەردەواممان بۆ مسۆگەر كردوون لەرێی دابینكردنی سەرجەم تێچووەكانی راكێشانی كارەبا بۆ بیری پڕۆژەكە و گەیاندنی بۆ دوو عەمباری گەورە لەڕێی بۆرییەوە بەدووری 400 مەتر و دابەشكردنی. 

هەر لەو چوارچێوەیەدا هاوكار جەلال بەڕێوەبەری دارستان و پاوانی سلێمانی رایگەیاند: "كارەكانی ئاودان لەپڕۆژەی دارستانی بانی مەقان زۆر بەباشی بەڕێوەدەچێت لەگەڵ ئەوەشدا و دوای تەواوبوونی بژار و بنكۆڵ، كرێكارەكانمان دەستیان كردووە بەئاگربڕ بۆ پاراستنی نەمامەكان و كۆی رووبەرە سەوزكراوەكان لەمەترسی ئاگركەوتنەوە و سووتان". 

بەڕێوەبەری دارستان و پاوانی سلێمانی وتیشی: "لەبەدواداچوونەكانمان بەردەوامین و لەرۆژانی رابردووشدا دڵنیابووینەوە لەگەشەی بەرچاوی نەمامەكان و سەركەوتنی پلان و هەوڵەكانمان بۆ خزمەتكردن و ئاودانی نەمامەكان لەدارستانەكانی ئاغجەلەر و قەرەداغ".

PUKMEDIA