قوباد تاڵەبانی: ماددەی 140 بەگەڕبخرێتەوە

نووسینگەی قوباد تاڵەبانی

كۆبوونەوەی قوباد تاڵەبانی لەگەڵ سەرۆكی دەستەی ناوچە كوردستانییەكانی دەرەوەی ئیدارەی هەرێم

بە مەبەستی یەكخستنی هەوڵەكان بۆ چارەسەركردنی كێشەی جوتیارانی كەركوك، قوباد تاڵەبانی جێگری سەرۆك وەزیران لەگەڵ فەهمی بورهان سەرۆكی دەستەی گشتی ناوچە كوردستانییەكانی دەرەوەی ئیدارەی هەرێم كۆبووەوە.

لە كۆبوونەوەكەدا كە رۆژی 5-7-2023 بەڕێوەچوو، تیشك خرایەسەر كێشەی زەوی و زاری جوتیارانی كورد و توركمان و دوای پێشكەشكردنی راپۆرتێك لەلایەن سەرۆكی دەستەی گشتی ناوچە كوردستانییەكانی دەرەوەی ئیدارەی هەرێمەوە، قوباد تاڵەبانی رایگەیاند: "پێویستە هەموو هەوڵەكان بۆ چارەسەركردنی كێشەی جوتیارانی كەركوك یەك بخرێت و جەختیشی كردەوە، هاوكار و پشتیوانی هەوڵەكان دەبێت و هەرچی پێویست بێت بۆ گەڕاندنەوەی مافی جوتیاران جێبەجێی دەكەن".
 
لە بەشێكی دیكەی كۆبوونەوەكەدا جێگری سەرۆك وەزیران ئاماژەی بە گرنگی خستنەوەسەرپێی هەنگاوەكانی جێبەجێكردنی مادەی 140ی دەستور دا و سەرۆكی دەستەی ناوچە كوردستانییەكانی دەرەوەی ئیدارەی هەرێمیشی راسپارد لە نزیكترین كاتدا سەردانی بەغداد بكات و لەگەڵ لایەنە پەیوەندارەكان كۆببێتەوە.

PUKMEDIA