کۆماندۆ و پۆلیسی سلێمانی روونکردنەوە بۆ رای گشتی بڵاودەکەنەوە

PUKMEDIA

لۆگۆی بەڕێوەبەرایەتی پۆلیسی سلێمانی و لۆگۆی کۆماندۆی کوردستان

کۆماندۆی کوردستان و بەڕێوەبەرایەتی پۆلیسی پاریزگای سلێمانی روونکردنەو بۆ رای گشتی بڵاودەکەنەوە و ئاماژە بەوە دەکەن، "هەواڵێك بڵاوكراوەتەوە كە گوایە هێزێكی كۆماندۆی كوردستان و مەفرەزەكانی بەشی پۆلیسی راپەڕین گرژی كەوتووەتە نێوانیان، لێرەوە بەهەموو لایەكی رادەگەیەنین ئەو هەواڵە سەراپای دورە لە ڕاستییەوە".

کۆماندۆی کوردستان: پارێزەری خاک و خزمەتکاری خەڵک دەبێت

کۆماندۆی کوردستان روونکردنەوەیەکی بڵاوکردووەتەوە و ئاماژە بەوەدەکات: "پاشنیوەڕۆی ئەمڕۆ یەکشەممە 2ی تەمموزی 2023، چەکدارێکی نەناسراو لە نزیک فڕۆکەخانەی سلێمانی دەستڕێژی گولە لە ئۆتۆمبێلێک دەکات، کە ژمارەیەک سەرنشینی تێدا بووە و لەنێویشیاندا ژن و منداڵ هەبووە و کەسێک بریندار دەکات، لەو کاتەدا کارمەندێکی هێزەکانی کۆماندۆ لەکاتی گەڕانەوەی لە ئەرکەکەی لە شوێنی رووداوەکە دەبێت و رێگری دەکات لە تۆمەتبار تا کارەساتی نەخوازراو روونەدات تەنها وەک ئەرکێکی ئەخلاقی و پیشەیی لە رووداوەکەدا بووە".

لە روونکردنەوەکەشدا هاتووە: "تۆمەتبار رووبەڕووی کارمەندەکەمان دەبێتەوە و تەقەی لێ دەکات و پێشمەرگەکەی کۆماندۆش راستەوخۆ تۆمەتبارەکە چەک دەکات و تۆمەتباریش بۆ شوێنێکی نادیار هەڵدێت و دوای گەیشتنی هێزە ئەمنییەکان بەهەڵە پێشمەرگەکەمان دەستگیر دەکەن دوای لێکۆڵینەوە ئازادی دەکەن و دەست خۆشیش لەپێشمەرگەکەمان دەکەن".

باس لەوەش کراوە: "لەهەمان کاتدا پێشمەرگەکەی کۆماندۆ دەست بەسەر چەک و ئۆتۆمبێلەکەی تۆمەتباردا دەگرێت"و "بۆ رای گشتی رووندەکەینەوە کە کوڕانی کۆماندۆی کوردستان هەمیشە پارێزەری خاک و خزمەتکاری خەڵک دەبن".

پۆلیسی سلێمانی: بۆ ناشیرینکردنی سلێمانی هەواڵێک بڵاوکراوەتەوە

لای خۆشیەوە بەڕیوەبەرایەتی پۆلیسی پاریزگای سلێمانی روونکردنەوەیەکی بڵاوکردوەتەوە و تێیدا هاتووە: "لەچەند پەیج و سایتێكی ئاژاوەگێرو بەمەبەست بۆ ناشرینكردنی شاری سلێمانی هەواڵێك بڵاوكراوەتەوە كە گوایە هێزێكی كۆماندۆی كوردستان و مەفرەزەكانی بەشی پۆلیسی راپەڕین گرژی كەوتووەتە نێوانیان، لێرەوە بەهەموو لایەكی رادەگەیەنین ئەو هەواڵە سەراپای دورە لە ڕاستییەوە".

ئاماژە بەوەش دراوە: "رووداوەكە بەجۆرێك بووە مەفرەزەكانی بنكەی پۆلیسی راپەڕین سەرقاڵی گرتنی تۆمەتبارێك بوون و لەوێ‌ كارمەندێكی هێزەكانی كۆماندۆی كوردستان ئامادەیی هەبووە و هاوكاری هێزەكانی پۆلیسی كردووە، دواتر دوو مەفرەزەی هێزەكانی كۆماندۆ بۆ هاوكاریكردنی هێزەكانی پۆلیس گەیشتوونەتە شوێنی رووداوەكە، سەرەنجام توانراوە دەستبگیرێت بەسەر چەكێك و ئۆتۆمبێلێكدا كە بە تۆمەتبار بووە".
PUKMEDIA