سەعدی پیرە: سایكس پیكۆ هۆكاری كێشەكانی كورد و ناوچەكەیە

دەرباز ستار

سەعدی ئەحمەد پیرە

رێكخراوی هاوپەیمانی پێشكەتوخواز كۆبوونەوەی دەستەی سەرۆكایەتی لە بەبرۆكسل-ی پایتەختی بەلجیكا  ئەنجامدا، لە كۆبوونەوەكەدا باس لە چۆنیەتی پاراستنی بەهاكانی هاودەنگی و دادپەروەری و ئازادی و دیموكراسی كرا، دواتر رێكخەری نوێی رێكخراوەكە هەڵبژێردرا لەگەڵ كۆمیتەی چاودێری دارایی و ئابوری .

وەفدێكی یەكێتی بەشداری تێداكرد و  سەعدی ئەحمەد پیرە ئەندامی بۆردی سەرۆكایەتی رێكخراوەكەیە و لە وتەیەكدا رایگەیاند : "كورد یەكێكە لە چوار نەتەوە سەرەكیيەكەی رۆژهەڵاتی ناوەڕاست، بەڵام تەنها ئێمە مافەكانی خۆمان وەرنەگرتووە بەهۆی سیاسەتی شكستخواردووی سایكس بیكۆ كە نەك بۆ كورد، بەڵكو سەرچاوەی كێشەكانی عەرەب و ئیسرائیل ، شیعە و سونە ، قوبرس و چەندین كێشەی تریشە" .  

 لە قسەكانیدا  سەعدی ئەحمەد پیرە  ئاماژەی بە رۆڵ و پێگەی وڵاتانی ئەندام لە رێكخراوی هاوپەیمانی پیشكەتوخواز كرد لە یارمەتیدانی عێراق و بەتایبەت هەرێمی كوردستان لە هاوكێشە نێودەوڵەتی و هەرێمایەتیەكاندا ، كە هەمیشە پاڵپشت و هاوكاری گەلی كورد بوون لە قۆناغە جیاوازەكاندا ، بەتایبەتی لە بەرزكردنەوە توانا مرۆییەكان و پاراستنی مافی مرۆف و دواجاریش لە شەڕی دژی تیرۆردا بە چەك و راوێژكارانی سەربازی هاوكار و پشتیوانی هێزەكانی پێشمەرگە بوون لە شكستپێهێنانی رێكخراوی تیرۆرستی داعش.

لە پەراوێزی بەشداریكردنی وەفدی یەكێتی نیشتیمانی كوردستان لە كۆبوونەوەكەدا چەندین كۆبوونەوەی گرنگیان لەگەڵ نوێنەری پارت و رێكخراوە جیهانییەكان ئەنجامدا.

رێكخراوی هاوپەیمانی پێشكەوتووخواز رێكخراوێكی جیهانیە و رێكخراوی پارتە سۆسیال دیموكراتەكانی جیهانە لە ساڵی 2013 لە شاری لایپزیگ لە ئەڵمانیا دامەزراوە و یەكێتی نیشتیمانی كوردستان ئەندامی دەستەی دامەزرێنەرە و یەكێكە لەو سێ پارتە سەرەكییەی رۆژهەلاتی ناوەڕاستە و سەعدی ئەحمەد پیرە ئەندامی بۆردی سەرۆكایەتی رێكخراوەكەیە.

PUKMEDIA