یاسای بودجەی عیراق بەرەسمی لەرۆژنامەی وەقائیعی عیراق بڵاوکرایەوە

PUKMEDIA

رۆژنامەی وەقائیع

ئەمڕۆ ٢٦-٦-٢٠٢٣ یاسای بودجەی عیراق بەرەسمی لەرۆژنامەی وەقائیعی عیراق بڵاوکرایەوە و یاساکە بەرەسمی کەوتە بواری جێبەجێکردنەوە.

دوای زیاتر لە دوو مانگ لیژنەی دارایی لە ئەنجومەنی نوێنەرانی عیراق گفتوگۆی وردیان لەسەر بڕگە بە بڕگەی پرۆژە یاسای بوودجە کرد و دواتر گفتوگۆی نوێنەرانی عیراق لەسەر پرۆژەكە لە ٧-٦-٢٠٢٣ەوە دەستیپێكرد و دوای 5 رۆژ دانیشتی پەرلەمان، پرۆژە یاسای بودجە بۆ هەر سێ ساڵی 2023، 2024، 2025 پەسندكرا و عیراق گەورەترین پڕۆژەیاسای بودجەی تێپەڕاند كە لە 134.5 ترلیۆن دینار پێكهاتووە و پشكی هەرێمی كوردستانیش تێیدا 12.67% ە، كە ساڵانە 20 ترلیۆن دینار و مانگانە 1.6 ترلیۆن دینار دەكات.

هەروەها هەرێم ساڵانە لەو رێژەیە 9 ترلیۆن دینار بۆ مووچە و مانگانەش  750 ملیار دینار بۆ مووچە تەرخان دەكات.

دوای پەسندکردنی، پرۆژە یاساکە رەوانەی سەرۆكایەتی كۆمارکرا و د.لەتیف رەشید سەرۆككۆمار ئیمزای کرد ئاڕاستەی رۆژنامەی وەقایعی عیراقی کرد تا تێیدا بڵاوبكرێتەوە و رایگەیاند: "پەسندكردنی بودجەی گشتی عیراق خاڵی وەچەرخانە بۆ جێبەجێكردنی كارنەمەكەی حكومەتی عیراق بەسەرۆكایەتی محەمەد شیاع سودانی" ئەمڕۆش ٢٦-٦-٢٠٢٣ یاسای بودجەی عیراق بەرەسمی لەرۆژنامەی وەقائیعی عیراق بڵاوکرایەوە و بەرەسمی کەوتە بواری جێبەجێکردنەوە

PUKMEDIA