ئاشتیخوازی و میانڕه‌ویی سیاسه‌تی به‌هێزی یه‌كێتییه‌

PUKMEDIA

لۆگۆی یەكێتی و نەخشەی عیراق

لە بەرامبەر روئیای زاڵ و كۆنەپەرستی روئیایەكی دیكە هەیە كە یەكێتیی نیشتمانیی كوردستان پەیڕەوی دەكات، كە روئیایەكی ئاشتی خوازانە و نەرم و روئیای چەپكە گوڵەكەی سەرۆك مام جەلالە كە بووەتە جێی دەستخۆشی خەڵك و لایەنەكان، ئەندامێكی سەركردایەتی یەكێتیش دەڵێت: "پێویستە هەموو لایەنەكان لە كوردایەتیدا لە یەكێتی بچن چونكە، بۆ بەرژەوەندی گشتی سیاسەت دەكات". 

یەكێتی پارێزەری مافە دەستوورییەكانی خەڵكی هەرێم و عیراقە

رابیحە حەمەد ئەندامی سەركردایەتی و لێپرسراوی مەڵبەندی بەغدای یەكێتی لە لێدوانێكیدا بۆ سایتی رەسمی یەكێتیی نیشتمانیی كوردستان PUKMEDIA رایگەیاند: "یەكێتی هەر لە سەرەتای دامەزراندنییەوە بۆ بەرژەوەندی گشتی و خزمەتی خەڵكی كوردستان دروستبووە، لە ئێستاشدا هەمان ئەو سیاسەت و رێبازە پەیڕەودەكات و ئامانجی كۆتایی هێنان بە زوڵم و زۆرە".

راشیگەیاند: "یەكێتیی نیشتمانیی كوردستان جگە لەوەی لە كوردستان پێگەیەكی بەهێزی هەیە، لە عیراقیش رۆڵێكی كاریگەر دەبینێت بۆ سەقامگیری وڵات، بە ئەركی خۆشی دەزانێت پارێزەری مافە دەستوورییەكانی خەڵكی هەرێمی كوردستان و گەلی عیراق بێت".

"سیاسەتی یەكتر قبوڵكردن و پێكەوەیی ئەو میكانیزمەیە كە یەكێتیی نیشتمانیی كوردستان لەپێناو بەرژەوەندی خەڵكدا پەیڕەوی دەكات، هەر ئەمەش وایكردووە یەكێتی لە حزبەكانی دیكە جیابكاتەوە و بە سیاسەتێكی نەرم و میانڕەوانە بناسرێت" رابیحە حەمەد وادەڵێت.

كوردستانی بوون خاڵی بەهێزی یەكێتییە

یەكێتیی نیشتمانیی كوردستان سیاسەتێكی كوردانە پەیڕەودەكات و خزمەتی خەڵك و دووركەوتنەوەی لە بیری تەسكی حزبایەتی كردووەتە بنەمای كارەكانی، هەر ئەوەش بووەتە خاڵی بەهێزی و لە حزبەكانی دیكەی جیاكردووەتەوە.

فەهیمە سابر ئەندامی سەركردایەتی یەكێتی لە لێدوانێكیدا بۆ سایتی رەسمی یەكێتیی نیشتمانیی كوردستان PUKMEDIA رایگەیاند: "ئەو سیاسەتەی یەكێتی لە هەرێم و عیراق و ناوچەكە پەیڕەوی دەكات سیاسەتێكی گونجاوە و بارودۆخەكە ئەو سیاسەتەی دەوێت كە بێگومان درێژەپێدەری سیاسەتی سەرۆك مام جەلالە، بۆیە پێویستە لایەنەكانی دیكەش لە كوردایەتیدا لە یەكێتی بچن".

راشیگەیاند: "سیاسەتی خزمەتكردنی خەڵك و دووركەوتنەوە لە سیاسەتی بیری تەسكی حزبایەتی و شەخسی یەكێتیی نیشتمانیی كوردستانی لە حزبەكانی دیكە جیاكردووەتەوە و وایكردووە لەسەر ئاستی هەرێم و عیراق و تەنانەت ناوچەكەش بەچاوێكی دیكە سەیری یەكێتی بكرێت، ئەمەش بە شاهیدی دۆست و دوژمن لە واقعدا سەلمێندراوە".

"خاڵی بەهێزی یەكێتی ئەو سیاسەتە كوردستانییەیە كە لەهەموو كوردستان پەیڕەوی دەكات و هەروەها ئەو پەیوەندییە دۆستانەیەیە كە لە عیراق و ناوچەكە درێژەی پێدەدات، تەنانەت بەهۆی سیاسەتە دروستەكەیەوە قوربانی زۆری داوە، بەڵام كۆڵی نەداوە" فەهیمە سابر وادەڵێت.

سیاسەتی میانڕەوانەی یەكێتیی نیشتمانیی كوردستان فاكتەرێكی گرنگی چارەسەركردنی كێشەكانی هەرێم و عیراق بووە و هەرگیز نەبووەتە هۆكاری دروستبوونی ئاڵۆزی، هەربۆیە بەردەوام دیالۆگ و گفتوگۆی بە چارەسەر زانیوە و بەنێوەندگیری خۆی كاریگەری لەسەر رێڕەوی سیاسی هەرێم و عیراق و ناوچەكە هەبووە، ئەمەش درێژەپێدەری ئەو سیاسەتەی سەرۆك مام جەلالە كە هەر لەسەرەتای دامەزراندنی یەكێتییەوە دایڕشتووە.

PUKMEDIA