هەڵمەتی نیشتمانی چاندنی یەک ملیۆن نەمام بەردەوامە

PUKMEDIA

ڕواندنی نەمام

بۆ زامنکردنی گەشەی ئەو نەمامانەی لەچوارچێوەی هەڵمەتی نیشتمانی بۆ ڕوواندنی یەک ملیۆن نەمام لەسەر بڕیار و راسپاردەی بافڵ جەلال تاڵەبانی سەرۆکی یەکێتیی نیشتمانیی کوردستان دا ڕوێنراون، قۆناغی خزمەتکردن لەئاودان و بژار و بنکۆڵ و ئاگربڕ دەستی پێکرد.

بۆ ئەو مەبەستە و لەمیانی بەسەرکردنەوەی هەر سێ پرۆژەی دارستانی کێلو لەپێنجوێن و دارستانی سەراو لە سیدسادق و دارستانی چەناخچیان سەر بەهۆبەی دارستان و پاوانی تانجەرۆ، هاوکار جەلال بەڕێوەبەری دارستان و پاوانی سلێمانی رایگەیاند هەڵمەتەکە تەنیا ڕواندنی نەمامی نەگرتەوە بەڵکو بە فەرمانی سەرۆک بافڵ دەستمان کردووە بەخزمەتکردن و ئاودانی نەمامەکان، بۆ ئەو مەبەستە ترومپا و سستمی ئاودێریمان بۆ نەمامەکان جێگیر کرد لەپڕۆژەکاندا لەپێناو مسۆگەرکردنی ئاودان لەکاتی پێویستدا.

هاوکار جەلال وتیشی: بەلەبەرچاوگرتنی جۆراوجۆریی نەمامە ڕوێنراوەکان و سروشت و کەشوهەوای جیاوازی ناوچەکان، تێبینیمان کرد کەنەمامەکان بەشێوەیەکی زۆر باش گەشەیان کردووە و کارەکانی هەڵمەتەکە سەرکەوتوو بووە.

هاوکار جەلال بەڕێوەبەری دارستان و پاوانی سلێمانی ئاماژەی بەوەش کرد کە بۆ پاراستنی نەمامەکان لەهەر ئەگەرێکی زیانگەیاندن و لەوەڕاندنی هەڕەمەکی، توانیمان لەسەر بودجەی هەڵمەتەکە، پەرژین بۆ رووبەرە سەوزکراوە نوێیەکان بکەین سەرباری دروستکردنی هێڵی ئاگربڕ بۆ پاراستنی لەهەر مەترسییەکی ئاگرکەوتنەوە لەگەڵ ئەنجامدانی کاروبارە گرنگەکانی وەک بژار و بنکۆڵکردنی نەمامەکان بەکرێکار.

سەرکەوتنی هەڵمەتی نیشتمانی سەوزکردنی کوردستان بەڕواندنی یەک ملیۆن نەمام هەنگاوێکی ئەرێنییە بەئاراستەی گرنگیدان بە ژینگە و سەوزایی کە بافڵ جەلال تاڵەبانی سەرۆکی یەکێتی لەڕووانگەی پەرۆشیەوە بۆ تەندروستیەکی باش بۆ هاوڵاتیانی هەرێمی کوردستان بڕیاری لەبارەوەداوە و جێبەجێی دەکات.

PUKMEDIA