لێدان لە قەوارەی هەرێم!

PUKMEDIA

کاوان سەلامی

نووسینی... کاوان سەلامی

کوردایەتی، پیرۆزی ئاڵا، دەستکەوتەکان، خوێنی شەهید و ناوی پێشمەرگە بەس نەبوو، ئێستا قەوارەی هەرێمیشی هاتەسەر.
با بزانین قەوارەی هەرێم بەچی دەکەوێتە مەترسییەوە؟
لە مێژە دڵسۆزانی ئەم قەوارەیە هاوار دەکەن جیاکاری تەنگی بە خەڵک هەڵچنیوە، نادادپەروەری مافە رەواکانی زەوتکردووە، خۆسەپێنی یاسای خانەنشین کردووە و دروشمە بێ کردارەکان باوەڕەکانی کاڵکردووەتەوە.
مێژووی وڵاتانی جیهان پێمان دەڵێت، گەورەترین دوژمنی قەوارەی هەر وڵاتێک زەوتکردنی ئازادییەکان، نەبوونی شەفافییەت، نادادپەروەری، جیاکاری لەنێوان هاوڵاتییان، تاکڕەوی، بەکارهێنانی دەسەڵات بۆ لاوازکردنی یاسا و شکاندنی حورمەتی دادگاکان بووە، نەک پێداگری لەسەر گەڕاندنەوەی مافە بنەڕەتییەکان و زامنکردنی خۆشگوزەرانی بۆ هاوڵاتییان و رێگریکردن لە سیاسەتێک کە مەزاج و بەرژەوەندیی حزبی تێیدا قسەی یەکەم و کۆتایی دەکات.
لە جیهانی ئەمڕۆدا دەستگرتن بە پیرۆزییەکانی وەک خاک، شەهید، ئاڵا، پێشمەرگە و قەوارە بەبێ کردار وەک دوژمنایەتی لەگەڵ هەموو بەها ئەخلاقییەکان لێکدەدرێتەوە.