سەرۆک بافڵ و وەزیری ناوخۆی عیراق: هاوکاری و هاوئاهەنگی فراوانتر دەکرێن

نوسینگەی رۆژنامەوانی بافڵ جەلال تاڵەبانی

کۆبوونەوەی سەرۆک بافڵ

‌‎بافڵ جەلال تاڵەبانی، سەرۆکی یەکێتیی نیشتمانیی کوردستان لە سلێمانی پێشوازی لە عەبدولئەمیر شەمری، وەزیری ناوخۆی عیراق كرد.

‌‎لەدیدارێکدا كە رەفعەت عەبدوڵا بڕیاردەری دەستەی کارگێڕی و شاڵاو عەلی عەسکەری، کارگێڕی مەکتەبی سیاسی و جەلال شێخ ناجی سەرۆکی ئاژانسی پاراستن و زانیاری/زانیاری و وەستا رەسوڵ لێپرسراوی مەڵبەندی رێکخستنی پێشمەرگە و هیوا ئەحمەد سەرۆکی دەزگای ئاسایشی هەرێم و ئاسۆ شێخ تەها بەڕێوەبەری پۆلیسی پارێزگای سلێمانی ئامادەیبوون، دۆخی ئەمنیی وڵات و یەكخستنی هەوڵەكان لەپێناو پاراستنی سەقامگیری گفتوگۆی لەبارەوەكرا و جەخت لە فراوانكردنی هاوكاری و هەماهەنگییەكانی نێوان دەزگا ئەمنییەكانی هەرێم و عیراق كرایەوە.


‌‎سەرۆک بافڵ جەلال تاڵەبانی ئامادەیی هەموو هاوكارییەكی بۆ هێزەكانی ناوخۆی عیراق دەربڕی و رایگەیاند:"پاراستنی ژیانی هاوڵاتییان و سەقامگیریی ناوچەكە بەرپرسیارێتیی هەموومانە، بەردەوامیی هەماهەنگییەكانیش فاكتەری بەهێزبوون و هەنگاوی زیاترە لەپێناو رووبەڕووبوونەوەی یاساشكێنان و هەموو ئەوانەی ئارامیی وڵات دەخەنە مەترسییەوە".

PUKMEDIA