‎یەكێتییەكەی ئێمە

PUKMEDIA

گۆڤەند رەجەب

گۆڤەند رەجەب

‎یەكێتیی نیشتمانیی كوردستان كە دامەزرا، بووە قۆناغێكی جیاواز لە مێژووی بزووتنەوەی كوردایەتی، قۆناغی خێڵ و ناوچەیی تێپەڕاند و بووە بزووتنەوەیەكی نیمچەبەرەیی كەوا زۆرینەی كەسایەتییە كوردستانییەكانی سەرجەم پارچەكان و تێكۆشەرە ئازاكانی زیندان و دڵشكاوەكانی دوای شكستی شۆڕشی ئەیلولی لە دەوری خۆی كۆكردەوە.

‎سەرۆك مام جەلال وەكو خاڵی كۆكەرەوەی جیاوازییەكان بووەوە چەتری بیروباوەڕە نوێیەكانی شۆڕشی نوێی گەلی كورد، ئەوە یەكێك لە هۆكارە سەرەكییەكانی بڵێسەسەندنی زیاتری شۆڕشی نوێی گەلەكەمان بوو كە لە ماوەیەكی كەمدا قەڵەمبازیی گەورەی بۆ بەدیهێنانی ئامانجە نەتەوەییەكان هاوێشت.

‎یەكێتی لە هەموو رووەكانییەوە نوێ بوو، بیركردنەوەی نوێ، سیاسەت و ستراتیژی نوێ، سەركردە و رێبەرایەتیكردنی نوێ، تاكتیكی نوێ بۆ زاڵبوون بەسەر هێزی دوژمندا، تا ئەوەی ئیتر سات و رۆژ و شەوەكان پڕبوون لە چالاكیی پێشمەرگانە و رژێم بەتەواوی لێی تۆقی بوو.

‎یەكێتی گوڕی نوێی شۆڕش بوو، هێزی زۆری هاتن و چوون، پلانی زۆری لێكرا، بۆسە لەدوای بۆسە بۆی نرایەوە، گەلەكۆمەی زۆری لێكرا، بەڵام چونكە هێزی یەكێتی لە خەڵكەوە و بۆ سەربەخۆیی و ئازادیی نیشتمان بوو، بەسەر هەموویاندا سەركەوت و دەرەنجام بووە ئەندازیاری راپەڕین و رزگاریی عیراق و تاجی سەركەوتنی لەسەرنا.

‎یەكێتییەكەی ئێمە، ئێستاش بەهەمان گوڕ و تینەوە بۆ خەڵكەكەی تێدەكوشێ، ئەمە دەستەبەری ئەوە دەكات مادام وایە و یەكێتی بەهێزە، كەواتە كوردستان و خەڵكەكەی پارێزراو دەبن و داهاتوویان روونە.

PUKMEDIA