یادا مەزن (48) مین ساڵڤەگەڕا بەزاندنا تاكڕەویێ یە

PUKMEDIA

ئیمان ئامێدی

پەرلەمانتار/ ئیمان ئامێدی

د سەردەمەكیدا كو بێ ئومێدیێ شاپەرێ خۆ بسەر كوردستانێ و گەلێ كورد دا كێشابوو، بزاڤا رزگاریخوازا كوردی ئێفلیج ببوو، ئێكەتی نیشتمانی كوردستان وەكو بزاڤەكا ئومێدبەخش و كلیلا ڤەكرنا دەرگەهەكێ نووی بۆ گەلێ كورد ژدایكبوو.

د (48) ساڵێن خەبات و تێكۆشانا خۆ یا بێ راوستان و مشتی سەروەری دا، ئێكەتی د چەندین وێستگەهێن سەخت و دژوار دا دەرباز بوو، چەندین جاران شكەستن ب شكەستنێ ئینا، هندەك جاران ژی، لژێر فشارێن گران و ژئەگەرێ‌ دربێن ببەر جەستەیێ وێ كەفتین، كو هند ب ژان و ئازار بوون، ئەگەر نە ئێكەتی با هیچ لایەنەك نە دشیا خۆ لبەر بگریت، بەلێ بەردەوام ئێكەتیێ خۆ راگرت..

ژبەركو باوەریەكا خورستی و ل ئاست داخوازی و مافێن رەوایێن گەلێ كوردستانێ ب خۆ هەبوو، هەڵبەت قەلەنێ وێ خۆراگریێ ژی كێم نەبوو، بەلكو رووبارەكێ خوینێ و فیداكاریا بهزاران پێشمەرگە و فەرماندە و سەركردە و ژدەستدانا كەسانێن دلسوز و خوشەویست بوو.

د (48) ساڵێن دەربازبووییدا پێنگاڤ و هەڵویست و تێكۆشان و پرۆژێن سیاسیێن ئێكەتی نیشتمانی كوردستان دهەڤتەریب بوون دگەل داخوازیێن كۆمەڵێن خەلكێ كوردستانێ و بێی جوداهیا نەتەوی و ئایینی و تایفی، ئەڤەژی گروڤێ خاكیبوون و نیشتمانپەروەرییا ڤێ هێزێ یە.

بەلێ هێشتا كار و ئەركێن گرنگ و گران لسەر ستوویێ ئێكەتی نیشتمانی ماینە و پێدڤیە ئەنجام بدەت، پێخەمەت گەهشتنا وان ئارمانجان ژی، ئێكەتی یا پێدڤی خۆ رێكخستنەكا سەرانسەری یە، یا پێدڤی ئاشتبوون و ئاشتكرنەكا گشتگیرە، گەرەكە ئێكەتی ڕەخنەیێن دوست و دلسوزێن خۆ ب گیانەكێ لێبوردەیی وەربگریت، ژبەركو بێی رەخنە و دەستنیشانكرنا خالێن خراب و لاواز و چارەسەركرن و تیماركرنا وان، دێ بنە برین و دیسان خوین ژێ رژیت..

ساڵرۆژا دامەزراندنا ئێكەتی نیشتمانی كوردستان، نە بتنێ ساڵڤەگەڕا دامەزراندنا حزبەكێ یە، بەلكو ساڵرۆژا دەربازكرن و بەزاندنا هزرێن پاشڤەروو و تاكڕەوی و تاكڕەهەندیا حزبی و سیاسیە، دهەمان دەمدا ساڵڤەگەڕا بەرپابوونا شۆڕەشا نوویە ب سەركێشیا سەرۆك مام جەلال..

PUKMEDIA