سەرۆک بافڵ: شێخانی تەریقەت رۆڵیان لە بڵاوکردنەوەی بیری میانڕەویدا هەبێت

نووسینگەی رۆژنامەوانی سەرۆکی یەکێتی

کۆبوونەوەی سەرۆک بافڵ و شێخ نەهرۆ شێخ محەمەد کەسنەزانی

بافڵ جەلال تاڵەبانی، سەرۆکی یەکێتیی نیشتمانیی کوردستان لە دەباشان پێشوازیکرد لە شێخ نەهرۆ شێخ محەمەد کەسنەزانی، سەرۆکی تەریقەتی عەلییەی قادری کەسنەزانی لە جیهان.

لە دیدارێکدا کە شێخ جەعفەر شێخ مستەفا، جێگری سەرۆکی هەرێمی کوردستان و جەلال شێخ کەریم و شێخ ئەحمەد حەمەکەریم، ئەندامی مەکتەبی سیاسی ئامادەبوون، دۆخی هەرێم و گۆڕانکارییە سیاسییەکان تاوتوێکران و جەخت لە یەکخستنی هەوڵە نیشتمانییەکان کرایەوە لەپێناو پاراستنی سەقامگیری و خزمەتکردنی خەڵک.

سەرۆک بافڵ جەلال تاڵەبانی ئاماژەی بە هەوڵەکانی یەکێتی کرد بۆ قووڵکردنەوەی گیانی تەبایی و پێکەوەژیان و رایگەیاند، دەبێت شانازی بەو فرەڕەنگی و پێکەوەژیانە بکەین کە لە هەرێمی کوردستان هەیە و گەشەی پێبدەین. هەموومان پێکەوە دەتوانین خزمەتی کوردستان بکەین و داهاتوویەکی گەشتر بونیادبنێین.

سەرۆک بافڵ وتیشی، وەکچۆن شێخانی تەریقەت لە رابردوودا رۆڵی گرنگیان گێڕاوە لە بڵاوکردنەوەی بیری میانڕەویی و پەرەپێدانی چاکەی گشتی، لەداهاتووشدا بەهەمان رۆحییەتەوە بەردەوامبن و رووخسارێکی گەشتر بە هەرێمەکەمان بدەن.
PUKMEDIA