باڵه‌كایەتی مێژووی پڕ شانازییان به‌خوێنی شه‌هیدان دەنوسنەوە

ئەرشیف

شەهیدی سەرکردە حەسەن کوێستانی

رۆژی شه‌هیدكردنی سه‌ركرده‌ حه‌سه‌ن كوێستانی و پۆلێك له‌ هاوڕ‌ێكانی به‌رۆژی شه‌هیدانی باڵه‌كایه‌تی داده‌نرێت و ئه‌و یاده‌ به‌رز راده‌گیرێت، له‌كاتێكدا ئه‌و ده‌ڤه‌ره‌ پڕ‌ شانازییه‌ خاوه‌نی هه‌زار و 300 شه‌هیدی سه‌نگه‌ره‌و شانازییه‌كی گه‌وره‌ی بۆ خۆی مسۆگه‌ر كردوه‌.

له‌رۆژێكی وه‌ك ئه‌مڕ‌ۆداو له‌ 17-5-1994 شه‌هیدی سه‌ركرده‌ حه‌سه‌ن كوێستانی و پۆلێك له‌فه‌رمانده‌ و پێشمه‌رگه‌ی قاره‌مانی هاوڕ‌ێی له‌شه‌ڕی نه‌گریسی ناوخۆدا شه‌هیدكران، ده‌ڤه‌ری باڵه‌كایه‌تی كه‌ كوانوی شۆڕ‌ش و خه‌بات و تێكۆشان و سیمبولی خۆڕ‌اگری و قوربانیدان و مه‌ڵبه‌ندی شه‌هیدان و به‌رخودانه‌، ئه‌نوای شۆڕ‌ش و رێبازی كوردایه‌تی و شۆڕ‌شی نوێی گه‌له‌كه‌مانه‌.


هاوكات باڵه‌كایه‌تی شانازییه‌كی گه‌وره‌تری له‌ سه‌رووی هه‌موو شانازییه‌كان  بۆخۆی مسۆگه‌ر كردووه‌، ئه‌ویش خوێنی گه‌ش و ئاڵی هه‌زارو 300 شه‌هیدی سه‌نگه‌ری یه‌كێتیی نیشتمانیی كوردستانه‌، كه‌ ناوی باڵه‌كایه‌تی پێ ده‌ناسرێته‌وه‌.


مه‌ڵبه‌ندی 6ی سۆرانی یه‌كێتیی نیشتمانیی كوردستان له‌م ساڵیاده‌دا له‌ راگه‌یه‌ندراوێكدا رایگه‌یاندوه‌: " له‌ یادو بیره‌وه‌ی رۆژی شه‌هیدانی باڵه‌كایه‌تیدا، یادێك ده‌كه‌ین بۆ ته‌واوی شه‌هیدانی سنووری مه‌ڵبه‌ندی 6ی سۆران، له‌ئاست رۆحی پاك و به‌رزه‌ فڕ‌ی ته‌واوی شه‌هیدانمان سه‌ری رێزو وه‌فاداری داده‌نوێنین و سڵاو ده‌نێرین بۆ كه‌سوكاره‌ سه‌ربه‌رزه‌كانیان، بۆیه‌ له‌ سۆنگه‌ی باوه‌ڕ‌ی به‌رزی نیشتمانیی و نه‌ته‌وه‌یمان به‌ خه‌باتی ره‌وای رێبازی كوردایه‌تی و شه‌هیدانمان، درێژه‌ پێده‌ری خوێندنگه‌ی سیاسه‌ت و فه‌لسه‌فه‌و دیدگای (سه‌رۆك مام جه‌لال) ده‌بین له‌ پێناوی پاراستنی ده‌سكه‌وته‌كانی گه‌له‌كه‌مان و ئاڵاو ئامانجه‌ گه‌وره‌كانتان، تا گه‌یشتن به‌ لوتكه‌ی سه‌ركه‌وتن و به‌دیهێنانی هه‌موو دروشم و ئامانجه‌كانی شه‌هیدانمان خه‌بات درێژه‌ی هه‌یه‌ ناسره‌وین تا سه‌ره‌كه‌وین".

PUKMEDIA