نوسینگەی قوباد تاڵەبانی:بەکارو خزمەت وەڵامی تێکۆشانی خەڵکی ڕاپەڕین دەدەینەوە

راگەیاندنی مەڵبەندی راپەڕین

وەفدی نوسینگەی قوباد تاڵەبانی

نوسینگەی قوباد تاڵەبانی جێگری سەرۆک وەزیرانی هەرێم، لەمیانەی بەسەرکردنەوەی ئیدارەی سەربەخۆی ڕاپەڕین، بەئامانجی لەنزیکەوە بەدواداچوون و هەڵسەنگاندنی دۆخی ئیداری و ئاستی خزمەتگوزاری ناوچەکە، لەگەڵ مەڵبەندی ڕاپەڕین کۆبوونەوە.

ئەحمەد زرار ئەندامی ئەنجومەنی سەرکردایەتی و لێپرسراوی مەڵبەندی ٢٤ی ڕێکخستنی ڕاپەڕین، بـەئـامـادەبونی هـەڤـاڵان جێگرو سەرپەرشتیاری ئیدارەی سەربەخۆی ڕاپەڕین و بەڕێوەبەری گشتی شارەوانییەکانی ڕاپەڕین و ژمارەیەک لەئەندامانی ئەنجومەنی مەڵبەند، پێشوازی لەوەفدی نوسینگەی قوباد تاڵەبانی جێگری سەرۆک وەزیران  ژووان صابر و عەتا محەمەد و تیمی یاوەرییان کرد.

لەکۆبوونەوەیەکدا، کە لەهۆڵی چالاکییەکانی مەڵبەند بەڕێوەچوو، لێپرسراوی مەڵبەند بەوردی هەڵوەستەی لەسەر ڕەوشی ئیداری و خزمەتگوزاری ناوچەکە کردو لەگەڵیدا پێشنیارو ڕاسپاردەکانی مەڵبەندی لەپێناو گەشەپێدانی ئیداری و بوژاندنەوەی خزمەتگوزاری و باشتر خزمەتکردنی کۆمەڵانی خەڵکی ڕاپەڕین خستنەڕوو، دواتر دەرگەی گفتوگۆ بەڕوی بەشداربوواندا کرایەوە، لەکۆتا وێستگەی کۆبونەوەکەشدا وەفدی نوسینگەی قوباد تاڵەبانی وێڕای بەهەند وەرگرتنی کۆی سەرنج و پێشنیارەکان، جەختیان لەکار لەسەر کردن و کارپێکردنیان کردەوەو ڕایانگەیاند؛ بەکارو خزمەت وەڵامی تێکۆشان و دڵسۆزی کۆمەڵانی خەڵکی ڕاپەڕین دەدرێتەوە.

PUKMEDIA