ئاسۆ مامەند: پێویستە گرنگی بە یادكردنەوەی كارەساتی ئەنفال بدرێت

PUKMEDIA

تاوانی ئه‌نفال

ئه‌مڕ‌ۆ 35 ساڵ به‌سه‌ر یادی ئه‌نفالكردنی گونده‌كانی بناری خاڵ خاڵان و گوندی جه‌له‌مۆرد تێده‌په‌ڕ‌ێت، ئاسۆ مامه‌ند كارگێڕ‌ی مه‌كته‌بی سیاسی یه‌كێتیش ده‌ڵێت: "قوربانی و خۆڕ‌اگری دانیشتوانی سنووره‌كه‌ له‌یاد ناكه‌ین و پێویسته‌ گرنگی زیاتری پێبدرێت".


ئاسۆ مامه‌ند كارگێڕ‌ی مه‌كته‌بی سیاسی یه‌كێتیی نیشتمانیی كوردستان له‌ یادی 35 ساڵه‌ی تاوانی ئه‌نفالی گونده‌كانی بناری خاڵخاڵان و جه‌له‌مۆرد وته‌یه‌كی پێشكه‌شكرد و رایگه‌یاند: "گوندی جه‌له‌مۆرد به‌خوێنی رۆڵه‌كانی قوربانی زۆری بۆ گه‌لی كورد داوه‌ و نابێت قوربانییه‌كانی له‌یاد بكه‌ین، هه‌ربۆیه‌ پێویسته‌ گرنگی زۆر به‌ یادكردنه‌وه‌ی ئه‌م كاره‌ساتانه‌ بدرێت تاكو نه‌وه‌ی داهاتوو ئاگاداری ئه‌و نه‌هامه‌تیانه‌بن كه‌ له‌ڕ‌ابردوودا به‌سه‌ر گه‌له‌كه‌ماندا هاتوون".

راشیگه‌یاند: "رژێمی به‌عس جیاوازی له‌ نێوان ره‌نگ و لایه‌نه‌كاندا نه‌كردووه‌و ده‌ستی له‌ هه‌وڵه‌كانی بۆ له‌ناوبردنی گه‌له‌كه‌مان نه‌پاراستووه‌، بۆیه‌ گرنگه‌ لایه‌نه‌ كوردییه‌كان یه‌كڕ‌یزی و ته‌بایی نێوان خۆیان بپارێزن تا جارێكی دیكه‌ گه‌له‌كه‌مان نه‌بێته‌وه‌ قوربانی".

بناری خاڵخاڵان له‌قۆناغی چواره‌می تاوانی ئه‌نفالدا به‌دڕ‌اندانه‌ترین شێواز له‌ چه‌ند قۆڵێكه‌وه‌ له‌ لایه‌ن جه‌یش و گه‌له‌جاشی حزبی به‌عسه‌وه‌ ھێرش كرایه‌ سه‌ر گونده‌كانی ئه‌و سنووره‌، ئه‌وه‌بوو له‌ئه‌نجامدا هه‌زار و 629 هاووڵاتی شه‌هید بوون، له‌و ژماره‌یه‌ش 487 كه‌سیان دانیشتووی گوندی جه‌له‌مۆرد بوون.

پڕۆسەی ئەنفال بووە هۆی‌ وێران كردنی‌ نزیكەی‌ (4)هەزار گوندو، (4)قەزا، (30) ناحیە، ( 3100)مزگەوت و (100)كڵێسا، لەڕوی ژەڵدارییەوە بووە هۆی‌ بەتاڵان بردنی‌ (2)ملیۆن سەر مەڕو ماڵات و ئاژەڵ.

PUKMEDIA