پێشوازی نێودەوڵەتی لە کۆبوونەوەی سەرۆک و جێگری سەرۆک وەزیران دەکرێت

نوسینگەی رۆژنامەوانی قوباد تاڵەبانی

کۆبوونەوەی سەرۆک و جێگری ئەنجومەنی وەزیران

کۆبوونەوەی ئەمڕۆی نێوان مەسرور بارزانی سەرۆکوەزیرانی هەرێمی کوردستان و قوباد تاڵەبانی جێگری سەرۆکوەزیرانی حکومەتی هەرێمی کوردستان کاردانەوی دیبلۆماسی و لایەنە نێودەوڵەتییەکانی لێکەوتەوە و هیوا دەخوازن سەرەتای پرۆسەیەکی رێککەوتنی ئاشتەوایی و هاوکار بێت و رێگە بەحکومەت بدات بەشێوەیەکی کاریگەر کاربکات.

رۆزی کەیف کۆنسوڵی گشتی بەریتانیا لەهەولێر لە لێدوانێکیدا کە لەپەیجی رەسمی کونسوڵخانە بڵاوکراوەتەوە رایدەگەیەنێت:"خۆشحاڵم کە دەبینم ئەمڕۆ سەرۆک وەزیران و جزیگری سەرۆک وەزیران کۆبوونەوە،هەنگاوێکی سەرەتای گرنگە بۆ پزیشکەوتن لەپرسە سەرەکییەکان لەڕێگەی گفتوگۆی بنیاتنەرەوە".

وتیشی:"حکومەتێکی یەکگرتووی هەرێمی کوردستان لەبەرژەوەندی هەموو خەڵکی هەرێمی کوردستانی عیراقدایە، هیوادارم ئەمە سەرەتای پرۆسەیەکی رێککەوتنی ئاشتەوایی و هاوکاربێت کەڕێگە بەحکومەت بدات بەشێوەیەکی کاریگەر کاربکات و کار بۆ هەموو هەرێم بکات".

باربڕا ڵیف: ئێمە پێکەوە یەکگرتووین

هاوکات باربڕا ڵیف، یاریدەدەری وەزیری دەرەوەی ئەمریکا لە بارەی کۆبوونەوەکەوە لە تویتێکدا رایگەیاند:" ئێمە پێکەوە یەکگرتووین لەو باوەڕەدا کە دەتوانین بەسەر تەحەددیاتەکانماندا زاڵ بین".

راشیگەیاندووە:" کاربکەین بۆ باشتر خزمەتکردنی هاووڵاتیانمان، و بەهێز بمێنینەوە لەبەرامبەر ئەو مەترسییە زۆرانەی کە ڕووبەڕووی هەرێمی کوردستان دەبێتەوە".

ئەلینا رۆمانسکی: لەسەر ئەم رێیە گرنگە هەنگاو بەرەو پێشەوە بنێین

لەلایەکی تریشەوە ئەلینا رۆمانسکی باڵیۆزی ئەمەریکا لە عیراق رایدەگەیەنیت:" دەستخۆشی لە  سەرۆک وەزیران و جێگری سەرۆکوەزیرانی هەرێمی کودستان دەکەم کە کۆبوونەوە بۆ ئەوەی دەست بکەن بە چارەسەرکردنی کێشەکان لە ڕێگەی گفتوگۆوە".

راشیگەیاند:"هەموو وڵات کاتێک سوودمەند دەبێت کە سەرکردەکانی سەرنجیان لەسەر پێداویستییەکانی خەڵک بێت، با لەسەر ئەم رێیە گرنگە هەنگاو بەرەو پێشەوە بنێین".

PUKMEDIA