سەرۆکی فراکسیۆنی یەکێتی: پارتی نایەوێت رێکبکەوێت

PUKMEDIA

زیاد جەبار سەرۆکی فراکسیۆنی یەکێتی لە پەرلەمانی کوردستان

سەرۆکی فراکسیۆنی یەکێتی لە پەرلەمانی کوردستان رایدەگەیەنێت، "یاسای ئێستای هەڵبژاردن زۆر خراپە، دەمانەوێت هەموار بکرێتەوە و لەگەڵ سەرجەم لایەنەکانی دیکە هاوڕاین، بەڵام پارتی نایەوێت لەگەڵمان رێکبکەوێت ".

نادادپەروەری لە دیاریکردنی نوێنەرەکاندا هەیە

زیاد جەبار سەرۆکی فراکسیۆنی یەکێتیی نیشتمانی لە پەرلەمانی کوردستان بە سایتی رەسمی یەکێتیی نیشتمانیی کوردستان PUKMEDIA ی راگەیاند: "یاسای ئێستای هەڵبژاردن زۆر خراپە و  یاساکەی ئێستا نادادپەروەری تێدایە و بەتایبەت لە دەستنیشانکردنی نوێنەرەکاندا، لەگەڵ ئەوەی لەگەڵ پارتی دیموکراتی کوردستان کێشەمان لەسەر کورسی پێکهاتەکان هەیە، بەڵام پێشنیارەکەی نەتەوە یەکگرتووەکان بەچارەسەر دەزانین و بۆئەوەش چاوەڕێی وەڵامی پارتین".

یەکێتی دەیەوێت یاسای هەڵبژاردن هەموار بکرێتەوە

وتیشی: "لەگەڵ پارتی و لایەنەکان لەسەر زۆر شت رێککەوتوین، بەڵام پارتی و پێکهاتەکان لەگەڵ ئەوە نەبوون یاسای هەڵبژاردن هەموار بکرێتەوە".
"وەک یەکێتی  دەمانەوێت یاسای هەڵبژاردن هەموار بکرێتەوە و جگە لە پارتی لەگەڵ سەرجەم لایەنەکانی دیکە هاوڕاین"، سەرۆکی فراکسیۆنی یەکێتی وادەڵێت.

پارتی رێککەوتنی ناوێت

دەشڵێت: "دەمانەوێت پێکهاتەکان نوێنەری راستەقینەی خۆیان هەبێت لە پەرلەمان، بەڵام پارتی نایەوێت لەگەڵمان رێکبکەوێت و نایەوێت پێکهاتەکان نوێنەری راستەقینەی خۆیان هەبێت".
"وەک یەکێتی هەمیشە دەستپێشخەریمان کردووە بۆ ئەنجامدانی هەڵبژاردن و لەگەڵ دواخستنیدا نین، هەروەها هەڵبژاردنێکمان دەوێت جێگەی خواستی خەڵک بێت".
PUKMEDIA