‎دوای 24 سەعات لە نمایش

PUKMEDIA

سەروەر بەرزنجی

سەروەر بەرزنجی

‎شەوی رابردوو بەجۆرێك نمایشی سەرۆكی حكومەت پەخش دەكرا كۆمەڵێك كەسی ئاڕاستەكراو كەوتبوونە سوكایەتی كردن بە خەڵكی بەشەرەفی سلێمانی، ھەولێریان لە ئێمەی خەڵكی پارێزگای سلێمانی كردبوە سویسرا سلێمانیشیان كردبووە قەسابخانە، بەڵام برای بەرپرسێكی دیاری كابینەكەی سەرۆكی حكومەت وەك جەژنانە تەرمی ھاووڵاتییەكی ناردەوە بۆ خانەوادەیەكی شاری ھەولێر.

‎لەكاتێدا خەڵكیان بە چایخانە سەرقاڵ كردبوو، چەند سەد مەترێك لەولای ئەو نمایشەی لەچایخانەكە كرا، جەستەی مرۆڤێكی كاسبكاری بێتاوان خەڵتانی خوێن كراو مناڵەكانیان بێناز كرد.

‎لەكاتێكدا مناڵێك لەسكی دایكیدا خەریكە چاو بەدنیا ھەڵدێنێت، رێك لەو رۆژەدا لەسەر شتێكی بێمانا ژیانیان لەباوكی سەندەوە، سبەی ئەو مناڵە گەورە دەبێت و دەپرسێت كێ باوكمی كوشت؟؟ ئەڵێن: "برای بەرپرسێكی كابینەی نۆ لە حكومەتەكەی ھەرێم، تەنھا لەبەر ئەوەی برای بەرپرسێكی ئەو كابینەیە بووە، لەشەوی لەدایكبونیدا باوكیان لێسەندەوە.

لەو شەوەدا لەچایخانەیەك نمایشی ئارامی پارێزگای ھەولێر دەكرا، باوكێك كوژرا كە ھیوای زۆری بە لەدایكبوونی منداڵەكەی بوو، بەڵام نە منداڵەكەی بینی و نە ئاواتەكەشی ھاتەدی،  چرای ماڵەكەی بۆ ھەتاھەتایە كوژایەوە.

‎دەی ئەوانەی 24 سەعات بە سلێمانیدا دەڕشێنەوە قسەیەك بكەن، باسی ئەو كارەساتە گەورە بكەن كەچۆن بەر لە جەژن ھەم جەژنی رەمەزانیان لە خانەوادەیەك تاڵ كرد و ھەم جەژنی لەدایكبوونی منداڵێكی ساوایان وێران كرد، ئەگەر خەمی ئارامی خەڵكتانە خۆ ھەولێرییەكانیش پێویستیان بە ئارامییە و داوای ئارامی دەكەن، واز لە سلێمانییەكان بێنن، كاتی ئەوەیە ئارامی ھەولێر بۆ ھەولێرییەكان مسۆگەر بكەن، رۆژێك لەسەر ترافیك، رۆژێك لەسەر فول لایت، رۆژێك لەسەر سەیارە شكاندنەوە، رۆژێك لەسەر نووسین، مرۆڤ فەلاقەدەكەن و بەسەرتاشین ئەتك دەكرێن.

PUKMEDIA