وەزیری كۆچی عیراق، وەزارەتی ناوخۆی هەرێمی هێنایە دەنگ

PUKMEDIA

وەزیری كۆچ و كۆچبەرانی عیراق و لۆگۆی وەزارەتی ناوخۆی حکومەتی هەرێم

ئیڤان فایەق جابرۆ وەزیری كۆچ و كۆچبەرانی عیراق هەندێك راستی لەبارەی ئاوارەكانی هەرێمی كوردستانی ئاشكراكرد و ئەوەش وەزارەتی ناوخۆی حكومەتی هەرێمی هێنایە قسە، وەزیری كۆچ و كۆچبەران بەوە تۆمەتبار دەكات كە "كەوتووەتە موزایەدەكردن و بڵاوكردنەوەی قسەی نامەسئولانە و بێ بنەما لەبابەتی ئاوارەكان و بەكارهێنانیان بۆ مەرامی سیاسی".

وەزیری کۆچ: دەسەڵاتمان بەسەر کەمپی ئاوارەکانی هەرێمدا نییە

وەزیری كۆچ و كۆچبەرانی عیراق لە چاوپێكەتنێكی تەلەفزیۆنیدا رایگەیاند: "دەسەڵاتمان بەسەر كەمپی ئاوارەكانی هەرێمی كوردستاندا نییە و چونكە لێپرسراوی ئەم كەمپانە لەهەرێمی كوردستان وەزارەتی ناوخۆیە و لەلایەن رێكخراوی بارزانیشەوە ئیدارەی كەمپەكان دەدرێت".
هاوكات وەزیری كۆچ و كۆچبەرانی عیراق ئاماژەی بەوەشكرد: "راپۆرتە نێودەوڵەتییەكان باسی پێشێلكاریی لە كەمپی ئاوارەكانی هەرێم دەكەن، هەربۆیە داوا لە مەسعود بارزانی سەرۆكی پارتی دیموكراتی كوردستان دەكەم هەوڵبدات پێشێلكارییەكان بەرامبەر بە ئاوارەكانی كەمپەكانی هەولێر و دهۆك رابگرێت. حكومەتی هەرێم دەرگا بۆ ئاوارەكان واڵابكرێت تا بگەڕێنەوە زێدی خۆیان".

وەزارەتی ناوخۆی حكومەتی هەرێمی كوردستان لە راگەیەندراوێكدا بەبێ ئاماژەدان بە ژمارەی ئاوارەكانی هەرێم و ژمارەی كامپەكان، بەوەزیری كۆچی عیراقی دەڵێت: "ئەم جۆرە دنیابینی و لێدوانانە شاردنەوەی خواستی ئاوارەكان و پەردەپۆشكردنی راستییەكانە و، بە هیچ شێوەیەك خزمەتی دۆخی ئاوارەكان و ئاساییبوونەوەی ژیانیان ناكات."و بەگوێرەی راگەیەندراوەكەی وەزارەتی ناوخۆ: " دۆخی ناوچەی ئەو ئاوارانەی لێوەهاتوون ئاسایی نەبوونەتەوە" و گوایە : "هۆكاری سەرەكیی نەگەڕانەوەی ئاوارەكان بە پلەی یەكەم، بوونی كۆمەڵێك هێزی نایاساییە لە دەڤەری شنگال و جێبەجێنەكردنی رێككەوتنامەی نێوان حكومەتی هەرێم و حكومەتی فیدڕاڵە لەمەڕ ئاساییكردنەوەی دۆخی شنگال".

پارتی دەنگی ئاوارەکان بەکاردەهێنێت

بەگوێرەی نوێترین ئاماری بەڕ‌ێوەبەرایەتی كۆچ و كۆچبەرانی هەرێم، "لەساڵی 2022 دا، ژمارەی ئاوارەكان بەگشتی لەهەرێمی كوردستان، نزیكەی 665 هەزار و ژمارەی پەنابەرانیش زیاتر لە 248 هەزار كەس بووە".
بەپێی ئاماری بەڕ‌ێوەبەرایەتی كۆچ و كۆچبەرانی هەرێم، نزیكەی 900 هەزار ئاوارە و پەنابەر لەهەرێم هەن و ئەندامێكی پەرلەمانی كوردستانیش دەڵێت: "پارتی بۆ بەرژەوەندی خۆی بارزگانی بەدەنگی ئاوارەكانەوە دەكات و لە رێگەی حكومەتەوە رێگری لەگەڕانەوەی ئاوارەكان بۆ زێدی خۆیان دەكات".

رۆژان محەمەد كەریم ئەندامی پەرلەمانی كوردستان بەسایتی رەسمی یەكێتیی نیشتمانیی كوردستان PUKMEDIA ی راگەیاند: "پارتی لەرێگەی حكومەتەوە رێگری دەكات لەوەی ئاوارەكان بگەڕێنەوە زێدی خۆیان، چونكە بازرگانی بەدەنگییانەوە دەكات".

هەڵبژاردن گەڕانەوەی ئاوارەکانی راگرتووە

"لەئێستادا عیراق و هەرێمی كوردستان هەڵبژاردنی لەپێشەوەیە، بۆیە پارتی لەرابردوو و لەئێستاشدا رێگری كردوە و بەردەوامیشە لەگەڕانەوە ئاوارەكان، چونكە بەدەنگی ئەوان چەندین كورسی لەپەرلەمانی كوردستان و لە ئەنجومەنی پارێزگاكانی عیراق بەدەستدەهێنێت و ئەمە جگە لەوەی لەرووی نێودەوڵەتییەوە بارزگانییان پێوەدەكات"، رۆژان محەمەد كەریم وایوت.
PUKMEDIA