یەکێتی قەڵغانی نەتەوەیەکە

PUKMEDIA

د.شیلان فەتحی

نووسینی... د.شیلان فەتحی

بەدەر لە مێژووەکەی، کە یار و نەیار گەواهیدەرن، بەدەر لە هەڵوێستی روونی سیاسی و میدیایی، یەکێتیی نیشتمانیی کوردستان بە پێوانەی دژایەتیکردنی یەکێتی لەلایەن دوژمنانی گەلی کوردەوە لە قۆناغە جیاجیاکاندا دەرخەری ئەو راستییەیە کە بەڵێ یەکێتی قەڵغانی نەتەیەوەیەکە.

بنکەی جەماوەریی یەکێتی، زۆرینەی سەرکردایەتی حزبەکە، دەسەڵات و پێگەی لە حکومڕانی هەرێمی کوردستاندا هەمیشە لەگەڵ ئەو ئاڕاستەیەدان کە خۆشگوزەرانی و ئازادی و مافی مرۆڤ و نیشتمانیبوون، لەسەرووی هەموو ویست و بەرەژەوەندییەکی کەسی و حزبییەوە بێت، هەربۆیە دەنگدەر و جەماوەری یەکێتی بەوە دەناسرێتەوە کە ئازادانە و ئازایانە رووبەرووی هەموو ناهەقییەک دەبنەوە، نەوت و هەڵوێستە نەتەوەییەکان کە یەکێتی بە ئەرک و دیسپلینی حزبی زانیوە چەند ساڵێکە هەندێ هێزی سیاسی هێزی مانەوە و خوێنی بەردەوامی لێوە وەردەگرن، یەکێتیش رۆژ دوای رۆژ بەشانازییەوە باجی قورسی لەسەر دەدات.

گۆڕانکارییەکانی چەند رۆژی رابردوو لە کەرتی نەوتی هەرێمی کوردستان چەندە نەرێنی بن لەمەڕ دەست بەسەرداگرتنی نەوتەکە لەلایەن دەسەڵاتی بەغداوە، کە رەهەندی سیاسی و نەتەوەیی هەیە و پەیوەستە بە داهاتووی نەتەوەیەکەوە، هێندەش ئەرێنییە، بەو مانایەی کە یەکێتی حزبێکی خاوەن کەرامەتی سیاسی و ئابڕووی بێ شوختی خۆیەتی و لێپرسراوانە لەوپەڕی خەمخۆرییەوە دەڕوانێتە ئاستی بژێوی و گوزەرانی هاووڵاتیان، کە لەم ساڵانەی دواییدا بەدۆخێکی خراپدا تێپەڕیووە.

لەتەک بەردەوامی سیاسەتی دوور مەودای کوردانە لە چوارچێوەی هێزێکی خەبات روون و ئامانج رووندا باج و بەرهەمی حزبی شەهیدان هاوتەریب رێ دەکات، بەشێوەیەک لەناو ئاڵۆزی و دژایەتی زەقی هێزە هەرێمییە بەرچاوتەنگەکاندا تاکە قەڵغانی نەتەوەیی کوردستانیان، یەکێتییە، گەمارۆ و پەلامار و پیلانگێڕییەکان هەر دژی یەکێتییە، لە دواین داژیەتیشدا ئەندامێکی ناتۆ کە لە گۆڕەپانی ناوچەکەدا باڵادەستە، گەمارۆی خستە سەر فرۆکەخانەی سلێمانی، راستە ئەم داژایەتییە بۆ سنوری دەسەڵاتی یەکێتی قورسە، بەراوردکاری ئەم نابەرابەرییەی یەکێتی و بەرامبەرەکەی بکرێت گەلەک نابەرامبەرە، وەک هەمیشە لەڕابردوو بە ئێستاشەوە یەکێتی هێزی بەرەنگاری مەحاڵ بووە، هەر بۆیە لە ناوەوەی پەیکەری یەکێتیدا ورە و شانازییەکی تری نەتەوەییە، بوون بە قەڵغانی نەتەوە، ئەمەش پەیامێکە دەبێت هێزە نیشتمانییەکان و هاووڵاتیانی کوردستانە بەگشتی بەچاوی شانازی لە یەکێتی بڕوانن، وەک چۆن یەکێتی لەخەمی هەمواندایە، پێویستە هەموانیش لە خەمی یەکێتیدابن.