هۆشیار عەبدوڵڵا: بەیاننامەكەی ئەنجومەنی ئاسایش گەشتە ئاسمانییەكانی توركیا و سلێمانی بە راگرتندا

ئاژانسەكان

هۆشیار عەبدوڵڵا

هۆشیار عەبدوڵڵا پەڕلەمانتاری پێشوی عیراق دەڵێت: "روونكردنەوەكەی وەزارەتی دەرەوەی توركیا لە دیاریكردنی هۆكاری راگرتنی گەشتەكان تارادەیەكی زۆر هەمان ئەو تۆمەتانە ئاڕاستەی سلێمانی دەكات كە بە مانشێت لە رۆژنامەی هەولێری پارتی و  بەیاننامەكەی ئەنجومەنی ئاسایشی هەرێمدا هەبووە و دوریش نییە سەرچاوەی زانیارییەكانی وەزارەتی دەرەوەی توركیا هەمان ئەو بەیاننامەیە نەبێت كە بایەخێكی زۆری پێدرا لە لایەن میدیای پارتییەوە!"

هۆشیار عەبدوڵڵا لە لە پەیجی فەیسبووكی خۆی وتارێكی بڵاوكردووەتەوە و دەڵێت: "گریمان زانیارییەكانی ناو بەیاننامەكەی ئەنجومەنی ئاسایش سەداسەد راستبوون، ئایا زانیاری لەو جۆرە هی ئەوەن بكرێنە مانشێتی رۆژنامەكان و بخرینە میدیا یان هی ئەوە بوون لە ئاستی تر كاریان لەسەر بكرێت!"  ئەو دەپرسێت: "ئەوەی ئەلف و بێی كاری  ئەمنی بزانێ و تۆسقاڵێك لە خەمی ئاسایشی هەرێمدا بێت، ناكۆكی سیاسی حزبی وای لێناكات بەمجۆرە وڵاتێكی وەك توركیا دژی شارێكی هەرێمەكەی خۆی هانبدات!"

"ئەمە جگە لەوەی دژایەتی سلێمانییە، لێدانێكی گەورەیە لە ئاسایشی نیشتمانی هەرێم و هەركەسێكی تر بەیاننامە و لێدوانی وای بڵاوبكردایەتەوە پارتی تۆمەتی ناپاكی گەورەی دەخستە پاڵی!"  هۆشیار عەبدوڵڵا وادەڵێت.

PUKMEDIA