لوقمان وەردی: حكومەتی هەرێم بڕیاری دادگا جێبەجێ دەكات نەك رێككەوتن

PUKMEDIA

لوقمان وەردی جێگری سەرۆكی فراكسیۆنی یەكێتی لە پەرلەمانی كوردستان

جێگری سەرۆكی فراكسیۆنی یەكێتی رایدەگەیەنێت: "ھەڕاجكردنی  نەوتی ھەرێم دەسكەوتەكەی بڕینی مووچە و دروستكردنی قەیرانی جۆراوجۆر و برسی كردنی خەڵك و خستنی هەرێم بوو بۆ ژێر قەرزێكی 30 ملیار دۆلاری، بۆیە پێویستە رێككەوتنەكە سەرەتای وازھێنانبێت لە كەلەرەقی و عینادی سیاسی و حوكمرانی لە ھەرێمی كوردستان".


لوقمان وەردی جێگری سەرۆكی فراكسیۆنی یەكێتی لە پەرلەمانی كوردستان لە لێدوانێكیدا بۆ سایتی رەسمی یەكێتیی نیشتمانیی كوردستان PUKMEDIA ی راگەیاند: "ئەوەی دوێنێ روویدا لە راستیدا رێككەوتن نەبوو بەڵكو جێبەجێكردنی بڕیاری یەكلاكەرەوەی دادگای ناوبژیوانی پاریس بوو، ساڵانێكی زۆریشە یەكێتی فشار و پێداگری دەكات لە پێناو بەرژەوەندی خەڵكی كوردستان و كۆتایی ھێنان بەناشەفافیەتی نەوت و تاڵانكردنی سامانی ژێر زەوی ھەرێم رێگای دروست ئەوەیە لەگەڵ بەغداد رێكەوتن بكرێت" .

ھێشتا زۆر لەبەرژەوەندی ھەرێمە؟

"چونكە پێش راگەیاندنی بەناو ئابوری سەربەخۆی كوردستان، پشكی ھەرێم 17% بوو لە بودجەی گشتی عیراق بەبێ ئەوەی یەك دڵۆپ نەوت دەربھێندرێت، كەچی دوای رێككەوتنی ناچاری رادەستكردنی تەواوی مەلەفی نەوتی ھەرێم بە كۆمپانیای نیشتیمانی سۆمۆ پشكی ھەرێم تەنھا 12.6% ە لە بودجەی عیراق كەچی ھێشتا زۆر لەبەرژەوەندی ھەرێمە؟" لوقمان وەردی وادەڵێت.

حكومەت داوای لێبوردن بكات

راشیگەیاند: "پێویستە حكومەت سوپاسی خەڵكی كوردستانە بەگشتی و مووچە خۆران بەتایبەتی بكات، چونكە لەماوەی 10 ساڵی ھەراج و سەركێشی كردن بە نەوتی ھەرێم دەسكەوتەكەی بریتی بوو لە بڕینی مووچە و دروستكردنی قەیرانی جۆراوجۆر و برسی كردنی خەڵكی كوردستان سەرەڕای ئەوەی كوردستان خراوەتە ژێر قەرزێكی 30 ملیار دۆلاری بۆیە دەبێت حكومەتی ھەرێم بەفەرمی داوای لێبوردن لە خەڵكی كوردستان بكات و قەرەبووشیان بكاتەوە".

كۆتایی عینادی سیاسی بێت

جێگری سەرۆكی فراكسیۆنی یەكێتی دەشڵێت: "ھیوادارین ئەوەی دوێنێ روویدا سەرەتای وازھێنانبێت لە كەلەرەقی و عینادی سیاسی و حوكمرانی لە ھەرێمی كوردستان، بڕیاری رادەستكردنی دۆسێی نەوت ھەنگاوێك بێت بەقازانجی كۆمەڵانی خەڵكی كوردستان بشكێتەوە ببێتە مایەی سەقامگیری سیاسی و بوژانەوەی ئابوری كوردستان و كۆتایی ھێنان بەنادادپەروەری، پێشكەشكردنی خزمەتگوزاری بۆ سەرجەم شارەكان بەبێ جیاوازی".

دوێنێ 4-4-2023، لەژێر فشاری دادگای ناوبژیوانی نێودەوڵەتی پاریس وەفدی حكومەتی هەرێمی كوردستان بەسەرۆكایەتی مەسرور بارزانی سەردانی بەغدای كرد و بڕیارەكەی دادگای پاریسی لەبارەی هەناردەی دۆسیەی نەوتی هەرێمی كوردستان جێبەجێ كرد.

PUKMEDIA