پێشوازی لەم پاڵەوانی نەوتە دەكەین

PUKMEDIA

به‌شی مۆنیته‌رینگ

حكومەتی هەرێم، لە 2009 دا  و 14 ساڵ بەر لە ئێستا پڕۆژەی هەناردەكردنی نەوتی راگەیاند، كە تێیدا رەوانشاد سەرۆك مام جەلال لەمەراسیمەكەدا وتارێكی پێشكەشكرد و روئیای راستەقینەی ئەم پڕۆسەیەی خستەڕوو كە: "دەرهێنانی نەوتی هەرێم لە رێی بۆرییەوە كە نەوتی عیراقی پێدا دەڕوات، رەوانەی بەندەری جەیهان دەكرێت و داهاتەكەیشی دەخرێتە بودجەی گشتی عیراق فیدراڵییەوە"، بەڵام پێنج ساڵ دوای راگەیاندنی پڕۆسەكە لە ساڵی 2014ەوە، حكومەتی هەرێم بە تایتڵی ئابووری سەربەخۆ، نەوتی هەرێمی سەربەخۆ فرۆشت!! بە دونیایەك تایتڵی رەنگاورەنگ و خەون و وەهمی گەورە دەورە درا، بەجۆرێك دەوترا لە فرۆشتنی نەوتەكە دا هەر هاووڵاتییەك 700 دۆلاری نەوتی پێدەدرێت، بە سەركەوتنی گەورە و مێژوویی باسی بۆ هۆنرایەوە، كەچی:

*دوای دەساڵ رۆژی 4/4/2023 لە بەغدا ئیمزای تەسلیمكردنی نەوتی هەرێم و فرۆشتنەكەی درایەوە بە بەغدا، مەسرور بارزانی لەوێ بوو، ئەمیش بە سەركەوتنی میژوویی باس دەكرێت!

*دوای دە ساڵ لە سەربەخۆیی ئابووری و فرۆشتنی نەوت، دەهۆڵی سەركەوتنە گەورەكە، هەرێمی كوردستان 32 ملیار دۆلار قەرزدارە.

* دوای 10 ساڵ لە دەهۆڵی سەركەوتنی سەربەخۆیی ئابووری، حكومەت هیچ ساڵێك پڕۆژەیاسای بودجەی نەناردووەتە پەرلەمانی كوردستان بۆ پڕۆژە و ئاوەدانی!

* دوای دەساڵ لە سەركەوتنی سەربەخۆیی ئابووری، سندوقی داهاتی نەوت، سفر داهاتی تێدابوو بە 32 ملیار دۆلاری قەرزەوە.

* دوای 10ساڵ لە سەركەوتنە گەورەكە، پڕۆژەی كەپكۆ بوو بە پەكوو (لە نیعمەتی نەوت).

* پێش دەساڵ، ئابووری سەربەخۆ سەركەوتنی گەورەبوو، دوای دەساڵیش فروشتنی لەرێی كۆمپانیای سۆمۆی بەغداوە هەر سەركەوتنی گەروەیە!، سەربەخۆیی و تەسلیمكردن چۆن هەردووكیان دەبن بە سەركەوتن!

*دوای دەساڵ، سەربەخۆیی ئابووریی، ئەگەر سەركەوتن بوو، بۆ بەردەوام نەبوو، كوا سیماكانی سەركەوتنی هەرێم؟ ئەگەر تەسلیمكردنیش سەركەوتنە، ئەدی بۆچی 10 ساڵ پێش ئێستا نەتان كرد، بە راستی 10 ساڵ زۆرە!

*سەربەخۆیی ئابووری نەوت، ئەوكات پارتی خۆی كرد بەخاوەنی سەركەوتنەكە و تەسلیمكردنەكەشی مەسروربارزانی خۆی دەكات بە پاڵەوانی سەركەوتن، دەشڵێت كەس ناكەم بە شەریكی ئەم سەركەوتنە و لەتویتەری خۆی وایجریواندووە!

*تازە 10 ساڵ، خەڵكی كوردستان باجی قەیران و 32 ملیار قەرزی نەوت و نەهامەتیەكانی دا، بەڵام گرنگە گەیشتبنە ئەو باوەڕەی سەرۆك بافڵ و یەكێتیی نیشتمانیی كوردستان: "كە نەوت و داهات بۆ ئاوەدانی و خۆشگوزەرانی بێت"، خەڵكیش پێشوازی لەم پاڵەوانانە دەكات كە نەوت و داهات بۆ خزمەت بێت!

به‌شی مۆنیته‌رینگ

PUKMEDIA