یەكێتی ئامانجی یەكبوونی كورد و بەدەستهێنانی مافەكانيیەتی

PUKMEDIA

پەیامی سەرۆک بافڵ بۆ نەورۆزی ملیۆنی ئامەد

یەكێتیی نیشتمانیی كوردستان هەر لەسەرەتاوە هەوڵ و تێكۆشانەكانی بۆ هاوكاری كردنی پارچەكانی دیكەی كوردستان بووە و لە ئێستاشدا لەسەر ئەو رێبازە بەردەوامە، بەشێوەیەك هەر بەشێكی كوردستان پێویستی بە هاوكاری یەكێتی بێت بێ درێغی هاوكار و پشتیوانیان دەبێت، هاوكات هەمیشە كەركوكی بە كلیلی چارەسەركردنی كێشەكانی كورد زانیوە و فیداكاری زۆری بۆ  كوردستانی بوون و ئازادكردنی كردووە".

بافڵ جەلال تاڵەبانی سەرۆكی یەكێتیی نیشتمانیی كوردستان لە ساڵیادی رزگاركردن و راپەڕینی كەركوك دا رایگەیاند: "كەركوك و كەركوكییە سەربەرزەكان دڵنیا دەكەمەوە یەكێتیی نیشتمانیی كوردستان ئەو هێزە دەبێت بۆ هەمیشە لەگەڵیان دەمێنێتەوە و بە خوێنی خۆمان قودسی كوردستان دەپارێزین".

زیاد جەبار سەرۆكی فراكسیۆنی یەكێتی لە پەرلەمانی كوردستان لە لێدوانێكیدا بۆ سایتی رەسمی یەكێتیی نیشتمانیی كوردستان PUKMEDIA رایگەیاند: "هەر لەسەرەتای هەوڵ و تێكۆشانەكانی یەكێتییەوە كەركوك جێی بایەخی بووە، هەروەك سەرۆك مام جەلال دەیوت: "كلیلی چارەسەركردنی كێشەكانی كورد كەركوكە"، هاوكات بەردەوام دەیوت: "كەركوك قودسی كوردستانە"، لەژێر رۆشنایی ئەو وتانەشدا یەكێتی فیداكاری زۆری بۆ ئەو شارە كردووە و قوربانی بۆ ئازاد كردنی داوە".

"هەر لەوچوارچێوەیەشدا یەكێتیی نیشتمانیی كوردستان لەسەرجەم قۆناغەكاندا هەوڵی تەواوی بۆ سەلماندنی كوردستانی بوونی كەركوك و خۆشگوزەرانی دانیشتووانەكەی داوە" زیاد جەبار وادەڵێت.

یەكێتی خەبات بۆ بەدیهێنانی قۆناغی رزگاری نیشتمانی هەر چوار پارچەی كوردستان دەكات

یەكێتیی نیشتمانیی كوردستان لەسەرەتای خەباتی خۆیەوە هاوكاری و پشتیوانی پارچەكانی دیكەی كوردستانی كردووە و لە ئێستاشدا خەباتی بۆ بەدیهێنانی قۆناغی رزگاری نیشتمانی هەر چوار پارچەی كوردستان بەردەوامە، بەردەوامیش جەخت لە بەرژەوەندی گەلی كورد و خەباتی پێكەوەیی دەكاتەوە".

هاوكات لەمیانەی بەڕێوەچوونی ئاهەنگی نەورۆزی مليۆنی كە لە ئامەدی باكووری كوردستان بەڕێوەچوو سەرۆك بافڵ پەیامێكی پیرۆزبایی پیشكەش كرد و رایگەیاند: "بە پشتیوانی هەموو لایەك فشار دەخەینە سەر حزبەكان كە بەرژەوەندی گەلەكەمان بخەنە پێش بەرژەوەندی خۆیان، كیشەكانمان دەخەینە لاوەو بۆ بەرژەوەندی گەلەكەمان پێكەوە شانبەشان خەبات دەكەین".

هەر لەوبارەیەوە سەرۆكی فراكسیۆنی یەكێتی راشیگەیاند: "یەكێتیی نیشتمانیی كوردستان لە هەموو قۆناغە جیاجیاكاندا پشتیوانی سەرجەم پارچەكانی دیكەی كوردستان بووە و رۆڵ و كاریگەری بەرچاوی لە هاوكاریكردنی لایەنە سیاسییەكانی پارچەكانی دیكەی كوردستان هەبووە بەبێ ئەوەی دەستوەردان لەناوخۆی ئەو حزبانەدا بكات".

"روئیا و سیاسەتی یەكێتیی نیشتمانیی كوردستان ئەوە بووە كە بەردەوام بە ئەركی خۆی زانیوە پشتیوانی پارچەكانی دیكەی كوردستان بێت و مێژوو شاهیدە كە یەكێتیی لە هەر چوارپارچەی كوردستان رۆڵ و كاریگەری خۆی هەبووە، ئێستاش خەبات بۆ بەدیهێنانی قۆناغی رزگاری نیشتمانی هەر چوار پارچەی كوردستان دەكات".

PUKMEDIA